అండర్ వాటర్ మెట్రో ట్రయల్స్ను విజయవంతంగా నిర్వహించింది కోల్కతా మెట్రో. హుగ్లీ నదిలో నిర్మించిన సొరంగ మార్గంలో.. మెట్రో రైలు బుధవారం పురుగులు తీసింది. కోల్కతాలోని మహాకరణ్ స్టేషన్ నుంచి హావ్డా మైదాన్ మెట్రో స్టేషన్ వరకు తొలిసారి ప్రయాణించింది. ప్రయోగాత్మకంగా చేపట్టిన ఈ ప్రయాణంలో.. కోల్కతా మెట్రో జనరల్ మేనేజర్ పి. ఉదయ్ కుమార్ రెడ్డి కూడా భాగస్వామి అయ్యారు. ఆయనతో పాటు మరికొందరు ఇంజినీర్లు, అధికారులు నదీ గర్భంలో మెట్రో ప్రయాణం చేశారు. ఈ పరిణామాన్ని.. కోల్కతా సహా ఆ నగర శివారు ప్రజలకు ఆధునిక రవాణా వ్యవస్థను అందించే దిశగా పడిన విప్లవాత్మక అడుగుగా అభివర్ణించారు మెట్రో ఉన్నతాధికారులు.
"కోల్కతా చరిత్రలో ఇదొక చారిత్రక ఘట్టం. ఈ మైలురాయికి చేరుకునేందుకు కోల్కతా మెట్రో సిబ్బంది ఎంతో శ్రమించారు. ఎన్నో అవరోధాలను అధిగమించాక ఈ విజయం దక్కింది. ఈ అండర్ వాటర్ ప్రయాణం.. త్వరలో మొదలయ్యే ట్రయల్ రన్కు సన్నద్ధతలో భాగం. మొత్తం 7 నెలల పాటు ట్రయల్ రన్ సాగుతుంది." అని ఉదయ్ కుమార్ రెడ్డి చెప్పారు.
మెట్రో రైలును నడిపిస్తున్న అధికారులు ఈ అండర్ వాటర్ మెట్రో ట్రయల్ రన్ పూర్తయి, ప్రయాణికులకు మెట్రో సేవలు అందుబాటులోకి వస్తే.. ఇరుగుపొరుగు జిల్లాలైన కోల్కతా, హావ్డా మధ్య రాకపోకలు మరింత సులువు కానున్నాయి. కోల్కతాలోని ఎస్ప్లెనేడ్, హావ్డా మైదాన్ మధ్య మొత్తం 4.8 కిలోమీటర్లు పొడవైన సొరంగ మార్గం నిర్మిస్తున్నారు. హుగ్లీ నదీ గర్భంలో.. 32 మీటర్ల లోతులో 520 మీటర్ల సొరంగం నిర్మించారు. మెట్రో రైలు ద్వారా ఈ దూరాన్ని 45 సెకన్లలో చేరుకోవచ్చని అంచనా. హావ్డా మెట్రో స్టేషన్ దేశంలోనే అత్యంత లోతైన మెట్రో స్టేషన్ కానుంది. ఇది 33 మీటర్ల లోతులో ఉంటుంది. కోల్కతా- హావ్డా అండర్గ్రౌండ్ మెట్రో సేవలు ఈ ఏడాదిలోనే ప్రయాణికులకు అందుబాటులోకి వస్తాయని అంచనా.
సొరంగంలో ప్రయాణిస్తున్న మెట్రో రైలు భారత దేశంలో మెట్రో సేవలు అందుబాటులోకి తెచ్చిన తొలి నగరంగా కోల్కతా నిలిచింది. 1984 అక్టోబర్ 24న కోల్కతా మెట్రో సేవలు మొదలయ్యాయి. భవానీపుర్ మెట్రో స్టేషన్ (ఇప్పుడు నేతాజీ సుభాష్ మెట్రో స్టేషన్) నుంచి ఎస్ప్లెనేడ్ వరకు తొలి రైలు ప్రయాణాలు సాగించింది. 2023 జనవరి నాటికి మూడు మార్గాల్లో మొత్తం 46.96 కిలోమీటర్ల మేర కోల్కతా మెట్రో సేవలు అందిస్తోంది.
ఇదీ చదవండి:
