భాజపా వ్యతిరేక పోరులో దీదీకి ముఫ్తీ మద్దతు!

బంగాల్​ ముఖ్యమంత్రి మమతా బెనర్జీకి మద్దతుగా నిలిచారు జమ్ముకశ్మీర్​ మాజీ సీఎం, పీడీపీ అధినేత్రి మెహబూబా ముఫ్తీ. ప్రజాస్వామ్యం, దాని విలువలను రక్షించుకునేందుకు అత్యవసరంగా ప్రతిపక్షాలు ఏకం కావాల్సిన అవసరం ఉందన్నారు. ఈ మేరకు దీదీకి లేఖ రాశారు.

దేశంలోని భాజపాయేతర పార్టీలకు లేఖ రాసిన బంగాల్​ ముఖ్యమంత్రి మమతా బెనర్జీకి మద్దతు పలికారు జమ్ముకశ్మీర్​ మాజీ సీఎం, పీడీపీ అధినేత్రి మెహబూబా ముఫ్తీ. ప్రజాస్వామ్యాన్ని, దాని విలువలను రక్షించుకునేందుకు ప్రతిపక్ష పార్టీలు ఏకం కావటం అత్యవసరమని పేర్కొంటూ ట్వీట్​ చేశారు.

మమతా బెనర్జీకి మద్దతుపలుకుతూ రాసిన లేఖను తన ట్వీట్​కు జత చేశారు ముఫ్తీ. భాజపా చర్యలకు.. దిల్లీ (సవరణ)బిల్లు మరో ఉదాహరణగా పేర్కొన్నారు. అలాగే.. ఆర్టికల్​ 370 రద్దు, జమ్ముకశ్మీర్​ విభజనను సూచిస్తూ ఆరోపణలు చేశారు.

" భారత రాజ్యాంగం కల్పించిన సమాఖ్య విధానాన్ని కేంద్ర ప్రభుత్వం బలహీనపరుస్తోందనే మీ భయాలను నేను అర్థం చేసుకున్నాను. భాజపా తన మెజారిటీని ఉపయోగించి బిల్లులను ఎలా ఆమోదించుకుంటోంది, ప్రత్యర్థులను ఎలా తోసిపుచ్చుతోందో ఇటీవలి జీఎన్​సీటీడీ బిల్లు సూచిస్తోంది. ఇది 2019లో జమ్ముకశ్మీర్​ను విభజించటంతో మొదలైంది. "

- లేఖలో మెహబూబా ముఫ్తీ.

భాజపా ఏకపక్ష, చట్టవిరుద్ధమైన చర్యలను వ్యతిరేకించేందుకు ప్రతిపక్షంలోని చాలా మంది తమ శక్తిని, స్వరాన్ని ఉపయోగించటం లేదని పేర్కొన్నారు ముఫ్తీ. జమ్ముకశ్మీర్​ను బహిరంగ జైలుగా చేసి రాజకీయ నేతలను నిర్బంధిస్తున్నారని ఆరోపించారు. ఎన్​ఐఏ, ఈడీ వంటి కేంద్ర ఏజెన్సీలను దుర్వినియోగిం చేస్తున్నారని విమర్శించారు. భాజపా చర్యలకు వ్యతిరేకంగా ఏకమై, సమష్టిగా పోరాటం చేయాల్సిన తక్షణ అవసరం ఉందని పేర్కొన్నారు.

ఇదీ చూడండి:భాజపాయేతర పార్టీలకు మమత లేఖ