15 రోజుల్లోనే 3 సార్లు గృహ నిర్భంధం: ముఫ్తీ

తనను అక్రమంగా గృహనిర్బంధం చేశారని మరోమారు ఆరోపించారు జమ్ముకశ్మీర్​ మాజీ ముఖ్యమంత్రి, పీడీపీ అధ్యక్షురాలు మెహబూబా ముఫ్తీ. పక్షం రోజుల్లోనే మూడోసారి తనని నిర్బంధించారని ట్విట్టర్​ వేదికగా ఆందోళన వ్యక్తం చేశారు.

భద్రత కారణాల పేరుతో తనను మరోమారు అక్రమంగా నిర్బంధించారని ఆరోపించారు జమ్ముకశ్మీర్​ మాజీ ముఖ్యమంత్రి, పీపుల్స్​ డెమొక్రటిక్​ పార్టీ (పీడీపీ) అధ్యక్షురాలు మెహబూబా ముఫ్తీ. పక్షం రోజుల్లోనే మూడోసారి తనను నిర్బంధించారని.. ప్రస్తుతం జరుగుతోన్న డీడీసీ ఎన్నికల ప్రచారానికి భాజపా మంత్రులను అనుమతించి తనపై ఆంక్షలు విధించటమేంటని ట్విట్టర్​ వేదికగా మండిపడ్డారు.

" 15 రోజుల్లోనే మూడోసారి ఇవాళ అక్రమంగా నిర్బంధించారు. ఇది చాలా ఘోరమైన ప్రజాస్వామ్య పరిస్థితి. భద్రతాపరమైన ఆందోళనలతో నా ప్రయాణాలను అడ్డుకున్నప్పుడు.. కశ్మీర్​లో భాజపా మంత్రులు స్వేచ్ఛగా ప్రచారం నిర్వహించేందుకు అనుమతి ఎలా ఇచ్చారు? "

- మెహబూబా ముఫ్తీ, పీడీపీ అధినేత్రి.

బుద్గాం జిల్లాలో పర్యటించేందుకు వెళ్లే ముందు శ్రీనగర్​ గుప్కర్​ రోడ్డులోని తన నివాసంలో గృహ నిర్బంధం చేశారని మంగళవారం ఆరోపించారు ముఫ్తీ. తాజాగా మరోమారు ట్విట్టర్​ వేదికగా కశ్మీర్​ అధికార యంత్రాంగంపై విమర్శలు చేశారు.

ఇదీ చూడండి: మళ్లీ గృహ నిర్బంధంలోకి ముఫ్తీ