సీబీఐ డైరెక్టర్​ పదవికి ముగ్గురు షార్ట్​లిస్ట్​!

సీబీఐ డైరెక్టర్​ నియామకానికి ప్రధాని మోదీ అధ్యక్షతన జరిగిన భేటీలో ముగ్గురి పేర్లను షార్ట్​లిస్ట్ చేసినట్లు తెలుస్తోంది. వారిలో యూపీ డీజీపీ అవస్థీ, హోంశాఖ ప్రత్యేక కార్యదర్శి కౌముది, ఎస్ఎస్​బీ డీజీ రాజేశ్ చంద్ర ఉన్నట్లు సమాచారం.

కేంద్ర దర్యాప్తు సంస్థ (సీబీఐ) డైరెక్టర్​గా ముగ్గురు పేర్లను సోమవారం షార్ట్​లిస్ట్ చేసింది ప్రధానమంత్రి నరేంద్ర మోదీ నేతృత్వంలోని అత్యున్నత స్థాయి కమిటీ. ఈ జాబితాలో ఉత్తర్​ప్రదేశ్ డీజీపీ హెచ్​సీ అవస్థీ, ఎస్​ఎస్​బీ డీజీ కుమార్ రాజేశ్​ చంద్ర, హోంశాఖ ప్రత్యేక కార్యదర్శి వీఎస్​కే కౌముది ఉన్నట్లు విశ్వసనీయ వర్గాల సమాచారం.

అవస్థీ.. యూపీ క్యాడర్​కు చెందిన 1985 బ్యాచ్​ ఐపీఎస్​ అధికారి. సీబీఐ సంయుక్త డైరెక్టర్​ సహా ఇతర ఉన్నత స్థాయుల్లో ఆయన పనిచేశారు. ప్రస్తుతం యూపీ డీజీగా ఉన్నారు.

రాజేశ్ చంద్ర.. బిహార్ క్యాడర్​కు చెందిన 1985 బ్యాచ్​ ఐపీఎస్​ అధికారి. ప్రస్తుతం సశస్త్ర సీమా బల్ (ఎస్​ఎస్​బీ) డైరెక్టర్ జనరల్​గా ఉన్నారు. కాగా, కౌమిది.. ఆంధ్రప్రదేశ్ క్యాడర్​కు చెందిన 1986 బ్యాచ్​ ఐపీఎస్​ అధికారి.

ఈ కమిటీలో ప్రధానితో పాటు భారత ప్రధాన న్యాయమూర్తి జస్టిస్ ఎన్​.వి రమణ, లోక్​సభలో విపక్షనేత అధీర్ రంజన్ చౌదరీ ఉన్నారు. దిల్లీలోని ప్రధాని అధికారిక నివాసంలో ఈ భేటీ జరిగింది.

ఇదీ చదవండి-బంగాల్​ హింసపై సీజేఐకి మహిళా న్యాయవాదుల లేఖ