మెడికల్ ఆక్సిజన్ సరఫరా ఫిబ్రవరితో పోల్చుకుంటే ఏప్రిల్ నాటికి నాలుగింతలు పెరిగిందని కేంద్రం తెలిపింది. ఫిబ్రవరి చివరి వారంలో ఒక్కోరోజు 1,273 మెట్రిక్ టన్నుల మెడికల్ ఆక్సిజన్ సరఫరా కాగా.. ఏప్రిల్ 17 నాటికి 4,739 మెట్రిక్ టన్నుల వరకు ఆక్సిజన్ సరఫరా చేసినట్లు స్పష్టం చేసింది.
దేశవ్యాప్తంగా కొవిడ్ కేసులు విపరీతంగా పెరుగుతున్న నేపథ్యంలో మెడికల్ ఆక్సిజన్ కొరత ఏర్పడింది. ఈ నేపథ్యంలో ఆసుపత్రుల్లో ఆక్సిజన్ ఏర్పాట్లు చేసేందుకు కేంద్రం సన్నాహాలు చేసినట్లు పేర్కొంది. రైల్వే శాఖ మరికొన్ని రోజులు 'ఆక్సిజన్ ఎక్స్ప్రెస్' రైళ్లను నడిపిస్తుందని తెలిపింది. ఈ రైళ్లలో లిక్విడ్ మెడికల్ ఆక్సిజన్, ఆక్సిజన్ సిలిండర్లను దేశవ్యాప్తంగా సరఫరా చేయనున్నట్లు వెల్లడించింది.