'టీకాలు కొనట్లేదనే వార్తలన్నీ అవాస్తవాలు'

కొత్తగా కరోనా టీకా డోసులను కేంద్రం కొనుగోలు చేయట్లేదన్న వార్తలను కేంద్ర ఆరోగ్య శాఖ తోసిపుచ్చింది. సీరం ఇన్​స్టిట్యూట్​ ఆఫ్​ ఇండియా, భారత్​ బయోటెక్​ సంస్థలకు టీకా డోసులు కొనుగోలు చేసేందుకు ఇప్పటికే.. అడ్వాన్స్​ రూపంలో డబ్బులు చెల్లించినట్లు స్ఫష్టం చేసింది.

వ్యాక్సిన్​ తయారీదారుల నుంచి కేంద్రం కొత్తగా వ్యాక్సిన్లు కొనుగోలు చేయట్లేదని వస్తున్న వార్తలను కేంద్ర ఆరోగ్య శాఖ ఖండించింది. అవన్నీ అవాస్తవాలనేనని చెప్పింది. కొవిషీల్డ్​ వ్యాక్సిన్ వద్ద నుంచి 11 కోట్ల టీకా డోసులు, భారత్​ బయోటెక్​ సంస్థ నుంచి 5 కోట్ల కరోనా టీకా డోసులు కొనుగోలు చేసేందుకు అడ్వాన్స్​ రూపంలో డబ్బులు చెల్లించామని స్పష్టం చేసింది.

"11 కోట్ల కొవిషీల్డ్​ వ్యాక్సిన్​ డోసుల కోసం సీరం ఇన్​స్టిట్యూట్​ ఆఫ్​ ఇండియాకు ఏప్రిల్​ 28న రూ.1,732.50 కోట్లను అడ్వాన్స్​గా చెల్లించాం. గతంలో ఆ సంస్థకు 10 కోట్ల టీకా డోసుల కోసం ఆర్డర్​ చేయగా.. 8,744 కోట్ల డోసులను అందుకున్నాం. మే, జూన్​, జులై నెలలకుగాను 5 కోట్ల కొవాగ్జిన్​​ టీకా డోసుల కోసం భారత్​ బయోటెక్​కు రూ.787.50 కోట్లను వందశాతం అడ్వాన్సు రూపంలో అందించాం. గతంలో రెండు కోట్ల కొవాగ్జిన్​ టీకా డోసుల కోసం ఆర్డర్ చేయగా.. ఇప్పటి వరకు 0.8813 కోట్ల టీకా డోసులు అందుకున్నాం. భారత ప్రభుత్వం కొత్తగా టీకా డోసులను ఆర్డర్ చేయటం లేదనే వార్తలు అవాస్తవాలు.

- కేంద్ర వైద్య ఆరోగ్య శాఖ

మరోవైపు.. కేంద్రం చేసిన ప్రకటనను సీరం ఇన్​స్టిట్యూట్​ ఆఫ్​ ఇండియా ధ్రువీకరించింది.

ఇదీ చూడండి:'నైట్రోజన్ ప్లాంట్ల ద్వారా ఆక్సిజన్ ఉత్పత్తి!'

ఇదీ చూడండి:'రెమ్​డెసివిర్​ అమ్మకాల్లో ఆ సంస్థల మాటేమిటి?'