Gujarat road accident today : గుజరాత్లో జరిగిన ఘోర రోడ్డు ప్రమాదంలో ఆరుగురు మరణించారు. మరో ఏడుగురు గాయపడ్డారు. శుక్రవారం ఉదయం అరావళి జిల్లాలోని కృష్ణపుర్, మాల్పుర్ గ్రామాల మధ్య ఈ దుర్ఘటన జరిగింది. మృతులు దాహోద్ జిల్లాలోని లిమ్ఖేడా, ఆరావళి జిల్లాలోని కృష్ణపుర్కు చెందిన వారని పోలీసులు గుర్తించారు.
వీరందరూ బనాస్కాంఠా జిల్లాలోని అంబాజీ ఆలయానికి వెళ్తున్నారు. రోడ్డుపై నడుచుకుంటూ వెళ్తుండగా.. ఇన్నోవా కారు వెనుక నుంచి వేగంగా వచ్చి ఢీకొట్టింది. కొందరు గాల్లోకి ఎగిరిపడి అక్కడికక్కడే ప్రాణాలు కోల్పోయారు. సమాచారం అందిన వెంటనే సహాయక సిబ్బంది ఘటనా స్థలానికి చేరుకున్నారు. క్షతగాత్రులను ఆస్పత్రికి తరలించారు.