Manish Sisodia Supreme Court : 'రూ.338 కోట్ల బదిలీ నిజమే!'.. సిసోదియాకు సుప్రీం నో బెయిల్​

Manish Sisodia Supreme Court Today : దిల్లీ మద్యం కుంభకోణం కేసుల్లో అరెస్టయిన ఆప్‌ నేత మనీశ్ సిసోదియాకు మళ్లీ నిరాశే ఎదురైంది. ఈ కేసులో ఆయనకు బెయిల్‌ ఇచ్చేందుకు సుప్రీంకోర్టు నిరాకరించింది. రూ.338 కోట్ల నగదు బదిలీకి సంబంధించి ఈడీ కొన్ని ఆధారాలు సమర్పించిందని న్యాయస్థానం వెల్లడించింది.

Manish Sisodia Supreme Court Today :దిల్లీ మద్యం కుంభకోణానికి సంబంధించి అవినీతి, మనీలాండరింగ్ కేసుల్లో అరెస్టయిన ఆ రాష్ట్ర మాజీ ఉప ముఖ్యమంత్రి మనీశ్ సిసోదియాకు సుప్రీంకోర్టులో మరోసారి ఎదురుదెబ్బ తగిలింది. ఈ కేసుల్లో ఆయన దాఖలు చేసిన బెయిల్ పిటిషన్లను అత్యున్నత న్యాయస్థానం తిరస్కరించింది.

'రూ.338 కోట్ల నగదు బదిలీకి..'
అవినీతి, మనీలాండరింగ్ కేసుల్లో రూ.338 కోట్ల నగదు బదిలీకి సంబంధించి ఈడీ కొన్ని ఆధారాలు సమర్పించిందని సుప్రీంకోర్టు వెల్లడించింది. ఈ ఆరోపణలకు సంబంధించి ఇప్పటికే విచారణ ప్రారంభమైనందున ఈ దశలో బెయిల్ ఇవ్వడం కుదరదని స్పష్టం చేసింది. ఈ కేసు విచారణను 6-8 నెలల్లో పూర్తి చేయాలని సంబంధిత అధికారులను ఆదేశించింది. ఒకవేళ విచారణ నిదానంగా సాగితే.. సిసోదియా మూడు నెలల్లోపు మళ్లీ బెయిల్​కు దరఖాస్తు చేసుకోవచ్చని సూచించింది.

'కేజ్రీవాల్ అరెస్ట్​ అవ్వడం పక్కా!'
Manish Sisodia Latest News :సిసోదియాకు సుప్రీంకోర్టు బెయిల్​ తిరస్కరణపై బీజేపీ ఎంపీ మనోజ్​ తివారీ స్పందించారు. "దేశ అత్యున్నత న్యాయస్థానం నిర్ణయం తర్వాత.. ఆమ్​ ఆద్మీ పార్టీ అవినీతితో నిండి ఉందని రుజువైంది. ఇక ఆప్​ అగ్రనేతల అరెస్ట్​కు సమయం దగ్గర పడింది. అరవింద్​ కేజ్రీవాల్​ త్వరలోనే అరెస్ట్​ అవుతారు" అని వ్యాఖ్యానించారు.

'కేజ్రీవాల్​ ఇంకెంతకాలం కాపాడుతారు?'
బీజేపీ నేత షెహజాద్​ పూనావాలా కూడా స్పందించారు. "ట్రయల్ కోర్టు, హైకోర్టు తర్వాత ఇప్పుడు సుప్రీంకోర్టు కూడా బెయిల్​ ఇచ్చేందుకు నిరాకరించింది. రూ.338 కోట్ల నగదు బదిలీకి సంబంధించి ఈడీ కొన్ని ఆధారాలు సమర్పించిందని సుప్రీంకోర్టు తెలిపింది. అరవింద్​ కేజ్రీవాల్​ ఇంకెంత కాలం అలాంటి వ్యక్తులను కాపాడుతారు?" అని ప్రశ్నించారు.

కింది కోర్టుల్లో ఊరట లభించకపోవడం వల్ల..
Manish Sisodia Delhi Excise Policy : దిల్లీ మద్యం కుంభకోణం కేసులో 2023 ఫిబ్రవరి 26న మనీశ్ సిసోదియాను సీబీఐ అరెస్టు చేసింది. ఆ తర్వాత మార్చి 9న ఈడీ కూడా సిసోదియాపై కేసు నమోదు చేసి అరెస్టు చేసింది. ప్రస్తుతం ఆయన కస్టడీపై తిహాడ్‌ జైల్లో ఉన్నారు. ఈ కేసుల్లో బెయిల్‌ కోసం కింది కోర్టుల్లో ఊరట లభించకపోవడం వల్ల సిసోదియా సుప్రీంకోర్టును ఆశ్రయించారు. సీబీఐ, ఈడీ కేసుల్లో వేర్వేరుగా బెయిల్‌ పిటిషన్లు దాఖలు చేయగా.. తాజాగా సుప్రీం అందుకు నిరాకరించింది.