Manipur Violence Supreme Court : మణిపుర్లో శాంతిభద్రతలు నెలకోల్పడంలో ప్రభుత్వ యంత్రాంగం, పోలీసు వ్యవస్థ పూర్తిగా విఫలమయ్యాయని సుప్రీం కోర్టు అభిప్రాయపడింది. మణిపుర్ దారుణాలపై ఎఫ్ఐఆర్లు నమోదు చేయడంలోనూ అక్కడి పోలీసులు అలసత్వం ప్రదర్శించారని ఆగ్రహం వ్యక్తం చేసింది. ఎఫ్ఐఆర్లు దాఖలు తీరు సైతం సరిగ్గా లేదని మండిపడింది. జాతుల మధ్య ఘర్షణలో పరిస్థితులను అదుపులోకి తెచ్చే విషయంలో పోలీసులు చేతులెత్తేశారని పేర్కొంది. మణిపుర్ డీజీపీని శుక్రవారం మధ్యాహ్నం 2 గంటలకు తమ ఎదుట హాజరుకావాలని అత్యున్నత న్యాయస్థానం ఆదేశించింది.
చీఫ్ జస్టిస్ డీవై చంద్రచూడ్ నేతృత్వంలో జస్టిస్ జేబీ పార్దివాలా, జస్టిస్ మనోజ్ మిశ్రలతో కూడిన సుప్రీం కోర్టు బెంచ్.. మణిపుర్ ఘర్షణలపై, మహిళలను నగ్నంగా ఊరేగించిన ఘటనపై సోమవారం మరోసారి విచారణ చేపట్టింది. మే 4న ఇద్దరు మహిళను నగ్నంగా ఊరేగించిన ఘటన తీవ్రంగా కలచివేసిందన్న చీఫ్ జస్టిస్ చంద్రచూడ్.. దారుణానికి సంబంధించిన పూర్తి వివరాలను అందజేయాలని ప్రభుత్వాన్ని ఆదేశించారు. ఘటన జరిగిన చోటు, జీరో ఎఫ్ఐఆర్, రెగ్యూలర్ ఎఫ్ఐఆర్ నమోదైన తేదీలను తమ ముందు ఉంచాలని తెలిపారు. 6వేల ఎఫ్ఐఆర్లలో ఎంతమంది నిందితుల పేర్లు నమోదు చేశారో తెలపాలన్న చీఫ్ జస్టిస్.. ఆ తరువాత వారి అరెస్ట్కు ఎలాంటి చర్యలు తీసుకున్నారో వివరించాలన్నారు.
మణిపుర్లో జరిగిన ఘటనలపై విచారణ చేయడంలో పోలీసులు తీవ్ర అలసత్వం ప్రదర్శించారన్న ప్రధాన న్యాయమూర్తి.. ఎఫ్ఐఆర్లను సైతం ఆలస్యంగా నమోదు చేశారని మండిపడ్డారు. ఇద్దరు మహిళలను నగ్నంగా ఊరేగించడంపై కేసు నమోదు చేయడంలోనూ.. పోలీసులు నిర్లక్ష్యం వహించారన్నారు. మణిపుర్లో పరిస్థితులపై పూర్తి స్థాయి నివేదిక కోసం ఓ రిటైర్డ్ జడ్జ్ కమిటీ లేదా సిట్ను ఏర్పాటు చేసే ఆలోచనలో ఉన్నట్లు సుప్రీంకోర్టు తెలిపింది.
అంతకు ముందు.. జాతుల మధ్య ఘర్షణలో మేలో మొత్తం 6,523 కేసులను రికార్డ్ చేసినట్లు మణిపుర్ ప్రభుత్వం సుప్రీంకోర్టుకు తెలిపింది. సోలిసిటర్ జనరల్ తుషార్ మెహతా.. కేంద్రం, మణిపుర్ రాష్ట్ర ప్రభుత్వం తరుపున సుప్రీం కోర్టు ముందు హాజరయ్యారు. మహిళలను నగ్నంగా ఊరేగించిన ఘటనలో మైనర్లతో పాటు మొత్తం ఏడుగురుని అరెస్ట్ చేసినట్లు కోర్టుకు తెలిపారు. బాధితుల స్టేట్మెంట్ను సైతం పోలీసులు రికార్డ్ చేశారని తుషార్ మెహతా కోర్టుకు విన్నవించారు. కాగా.. న్యాయవాది నిజాం పాషా బాధిత మహిళ తరుపున కోర్టుకు హాజరయ్యారు.
సుమోటోగా స్వీకరించిన సుప్రీం
Manipur Incident Details : జూన్ 20వ తేదీన.. నగ్నంగాఇద్దరు మహిళల ఊరేగింపు ఘటనపై అత్యున్నత న్యాయస్థానం కీలక వ్యాఖ్యలు చేసింది. ఈ ఘటన తనను ఆందోళనకు గురిచేశాయని, ఇలాంటి దాడులు ఏమాత్రం ఆమోదయోగ్యం కాదని సుప్రీంకోర్టు ప్రధాన న్యాయమూర్తి జస్టిస్ డీవై చంద్రచూడ్ వ్యాఖ్యానించారు. ఈ ఘటనపై కేంద్రం తగిన రీతిలో స్పందించకుంటే న్యాయస్థానమే చర్యలు చేపడుతుందన్నారు. ఈ ఘటనను సుప్రీం కోర్టు సుమోటోగా స్వీకరించింది. మహిళలపై హింస దృశ్యాలను సామాజిక మాధ్యమాల్లో ప్రసారం చేయడం పూర్తిగా రాజ్యాంగ విరుద్ధమని ధర్మాసనం వ్యాఖ్యానించింది. సామాజిక మాధ్యమాల్లో బహిర్గతమైన ఈ వీడియోతో ప్రజలు తీవ్ర ఆవేదనకు గురయ్యారని పేర్కొంది.
