- నేరం జరిగిన తేదీ: 1998 ఏప్రిల్ 17
- చోరీ అయిన సొమ్ము: రూ.45
- విచారణ సమయం: 24 ఏళ్లు
- తీర్పు వెలువడిన తేదీ: 2022 సెప్టెంబర్ 28
- శిక్షా కాలం: 4 రోజులు
ఆశ్చర్యంగా ఉంది కదూ! ఇదేదో సరదాగా రాసింది కాదు. ఉత్తర్ప్రదేశ్లోని ఓ కేసు డైరీ సంక్షిప్త రూపమిది. ఓ వ్యక్తి జేబులో నుంచి రూ.45 దొంగతనం చేసిన కేసులో ఏకంగా 24 ఏళ్ల తర్వాత తీర్పు వెలువడింది. నేరం తానే చేశానని అంగీకరించిన వృద్ధుడికి 4 రోజులు జైలు శిక్ష పడింది.
ఇదీ జరిగింది..
అది 1998 ఏప్రిల్ 17. ఉత్తర్ప్రదేశ్ మైన్పురిలోని ఛపట్టీ ప్రాంతానికి చెందిన వీరేంద్ర బాథం.. పోలీసులకు ఓ ఫిర్యాదు చేశాడు. లైన్గంజ్ దగ్గర తన జేబులోని రూ.45ను ఇటావాలోని భూరా ప్రాంతానికి చెందిన మన్నన్ అనే వ్యక్తి కాజేశాడని అందులో పేర్కొన్నాడు. పోలీసులు వెంటనే కేసు నమోదు చేశారు. నిందితుడ్ని అదుపులోకి తీసుకున్నారు. అతడి దగ్గరున్న రూ.45ను స్వాధీనం చేసుకున్నారు. మైన్పురిలోని సీజేఎం కోర్టు ఆదేశాలతో 1998 ఏప్రిల్ 18న మన్నన్ను జైలుకు పంపారు.
విచారణ ఖైదీగా జైలులో 2 నెలల 21 రోజులు ఉన్నాడు మన్నన్. తర్వాత బెయిల్పై విడుదల అయ్యాడు. కొంతకాలానికి పోలీసులు అభియోగ పత్రం సమర్పించారు. విచారణకు హాజరు కావాలని కోర్టు నుంచి సమన్లు వెళ్లినా మన్నన్కు అందలేదట. అసలు ఈ కేసుకు సంబంధించి ఎలాంటి సమాచారం లేదట. మన్నన్ గైర్హాజరు నేపథ్యంలో అతడిపై అరెస్ట్ వారెంట్ జారీ అయింది. అయితే.. భూరా ప్రాంతంలో మన్నన్ పేరుతో ఎవరూ లేరని పోలీసులు కోర్టుకు నివేదిక ఇచ్చారు.
రూ.45 చోరీ కేసు, మన్నన్పై జారీ అయిన అరెస్ట్ వారెంట్ ఇన్నేళ్లుగా అలానే పెండింగ్లో ఉన్నాయి. ఎలాగైనా ఈ కేసు నుంచి బయటపడాలని ఇటీవల అనుకున్నాడు మన్నన్. తాను నేరం చేశానని ఒప్పుకుంటున్నానని, అరెస్ట్ వారెంట్ ఉపసంహరించుకోవాలని కోరుతూ గత నెల 27న మైన్పురి సీజేఎం కోర్టును ఓ న్యాయవాది ద్వారా అభ్యర్థించాడు. ఇందుకు న్యాయస్థానం సానుకూలంగా స్పందించింది.
2022 సెప్టెంబర్ 28న కోర్టులో ప్రత్యక్షంగా హాజరయ్యాడు మన్నన్. నేరం చేశానని జడ్జి ముందు అంగీకరించాడు. కోర్టు అతడికి నాలుగు రోజులు జైలు శిక్ష వేసింది. పోలీసులు వెంటనే మన్నన్ను అదుపులోకి తీసుకుని.. కారాగారానికి తరలించారు.
