వివాహ మండపంలో వరుడి పక్కన ఇద్దరు వధువులు కూర్చున్నారు. వారి ఒళ్లో ఇద్దరు పిల్లలు ఉన్నారు. ఆ చిన్నారులు వారికి తోడుగా కూర్చున్నారనుకుంటే పొరబడినట్లే. ఆ పిల్లలు వారి బిడ్డలే. పిల్లలు ఉన్న వారిని పెళ్లి చేసుకోవటమేంటని ఆశ్చర్యపోతున్నారా? అవునండీ ఇది నిజమే. ఆ పిల్లల తండ్రీ ఆ వరుడే. ఇద్దరు యువతులను ప్రేమించి.. వారితో ఇద్దరు పిల్లలను కన్న తర్వాత ఒకే వేదికపై పెళ్లి చేసుకున్న ఈ అరుదైన సంఘటన ఛత్తీస్గఢ్, బస్తర్ జిల్లాలో జరిగింది.
ఇదీ జరిగింది:కేశ్కాల్ ప్రాంతంలోని ఉమ్లా గ్రామానికి చెందిన రంజన్ సింగ్ సలామ్తో ఆండేగా గ్రామానికి చెందిన దుర్గేశ్వరీ మార్కమ్ అనే యువతితో ముందుగా నిశ్చితార్థం అయింది. ఆ తర్వాత దుర్గేశ్వరి రంజన్ సింగ్ ఇంటికి వచ్చి ఉంటోంది. కొద్ది నెలల తర్వాత ఆమె ఓ ఆడపిల్లకు జన్మనిచ్చింది. అయితే.. ఆ తర్వాత కొద్ది రోజులకు అంవరీ గ్రామానికి చెందిన సన్నో బాయి గోటా అనే యువతిని ప్రేమించాడు. ఈ క్రమంలోనే సన్నో గర్భం దాల్చింది. ఆమె సైతం ఆడపిల్లకు జన్మనిచ్చింది. ఈ విషయం తెలుసుకున్న గ్రామస్థులు రంజన్ సింగ్ కుటుంబంతో మాట్లాడారు. గ్రామంలో పంచాయతీ సైతం నిర్వహించారు. ఇద్దరు యువతులు రంజన్ సింగ్ను పెళ్లి చేసుకునేందుకు అంగీకరించారు. అందుకు పెద్దలు సైతం ఒప్పుకోవటం వల్ల ఒకే వేదికపై ఈనెల 8న ఇద్దరిని వివాహం చేసుకున్నాడు రంజన్ సింగ్.