దారుణం.. గర్భిణీ భార్యకు హెచ్​ఐవీ ఇంజెక్షన్​ ఇచ్చిన భర్త

ఉత్తర్​ప్రదేశ్​లో ఓ భర్త అమానవీయ చర్యకు పాల్పడ్డాడు. గర్భిణీ భార్యకు హెచ్​ఐవీ రోగికి ఉపయోగించిన సూదితో ఇంజెక్షన్​ చేశాడు. విడాకులు కావాలని విచక్షణా రహితంగా ప్రవర్తించాడు.

ఉత్తర్​ప్రదేశ్​ అలీగఢ్​లో భార్య గర్భిణీ అనే దయాదాక్షిణ్యాలు లేకుండా పాశవికంగా ప్రవర్తించాడు ఓ భర్త. హెచ్​ఐవీ రోగికి ఉపయోగించిన సూదితో ఆమెకు ఇంజెక్షన్ చేశాడు. ఈ ఘటనకు సంబంధించి బాధితురాలి తండ్రి ఇచ్చిన ఫిర్యాదుతో లోధా పోలీసులు కేసు నమోదు చేశారు. తన కూతురి అత్తమామలతో పాటు ఆస్పత్రి యజమాని ఈ కుట్రలో భాగస్వాములని తండ్రి ఆరోపించారు. వీరంతా బంధువులే అని చెప్పారు.

కుటుంబసభ్యులు తెలిపిన వివరాల ప్రకారం.. నిందితుడు మహేష్ గౌతమ్​.. జిల్లా ఆస్పత్రిలోని ల్యాబ్​లో కాంట్రాక్టు టెక్నీషియన్​గా పనిచేస్తున్నాడు. గతేడాది డిసెంబర్​ 7న ఇతనికి వివాహమైంది. అయితే తన భర్తకు సహోద్యోగినితో అక్రమ సంబంధం ఉందని భార్యకు తర్వాత తెలిసింది. ఈ విషయంపై ఆమె నిలదీసినప్పటి నుంచి విడాకులు కావాలని అతడు వేధిస్తున్నాడు. ఈ క్రమంలోనే ఆమెకు హెచ్​ఐవీ సూదితో ఇంజెక్షన్​ చేశాడు. తను గర్భవతి అని తెలిసినప్పటి నుంచే తన భర్త హెచ్​ఐవీ అంటించేందుకు ప్రయత్నిస్తున్నాడని భార్య ఆరోపించింది.

విషయం తెలుసుకున్న పోలీసులు నిందితుడు సహా మొత్తం 9 మందిపై వివిధ సెక్షన్ల కింద కేసు నమోదు చేశారు.

ఇదీ చూడండి:Covid Test: ఇక పుక్కిలింతతో కొవిడ్​ నిర్ధరణ!