Ludhiana Cash Van Robbery : సప్తసముద్రాలు ఈది ఇంటి ముందు మురుగుకాల్వలో పడిపోయినట్లుంది ఓ గజదొంగదంపతుల పరిస్థితి. దాదాపు రూ.8.5 కోట్ల సొమ్మును దోచుకొని పారిపోయారు పంజాబ్కు చెందిన భార్యాభర్తలు. కానీ రూ.10 కూల్డ్రింక్ కోసం కక్కుర్తిపడి దొరికిపోయారు. వీరెందుకు ఇలా చేశారో? ఎక్కడి నుంచి రూ.8.5 కోట్ల డబ్బును చోరీ చేశారో? తెలుసుకోవాలంటే ఈ స్టోరీ చదివేయండి.
Mandeep Kaur Ludhiana : పంజాబ్‌లోని లూథియానాలో జూన్ 10న సీఎంఎస్ ఇన్ఫోసిస్టమ్స్‌ అనే సంస్థలో రూ.8.49 కోట్ల విలువైన సొమ్మును 'డాకూ హసీ'గా పేరున్న మన్దీప్ కౌర్ దోచుకొంది. దీంతో పంజాబ్ పోలీసులకు ఈ దోపీడి కేసు సవాలుగా మారింది. పోలీసుల నుంచి తప్పించుకునేందుకు తన భర్త జస్వీందర్ సింగ్తో కలిసి నేపాల్కు బయలుదేరింది మన్దీప్ కౌర్. దోపిడి విజయవంతమైనందుకు పనిలో పనిగా.. మార్గమధ్యంలో పుణ్యక్షేత్రాలు చూసి పోదామని మన్దీప్ కౌర్ అనుకుంది. మరోవైపు పోలీసులు దొంగల కోసం దర్యాప్తు ముమ్మరం చేశారు. మన్దీప్ సహచరుడు గౌరవ్‌ను అరెస్టు చేసి.. అతడి నుంచి కీలక విషయాలు రాబట్టారు. ఈ క్రమంలో కేసుకు సంబంధించిన 12 మందిలో 9 మందిని అరెస్టు చేశారు. వారి నుంచి రూ.21 లక్షల నగదు స్వాధీనం చేసుకున్నారు.
పోలీసులకు పట్టుబడిన మన్దీప్, జస్వీందర్ సింగ్ రూ. 10 కూల్డ్రింక్ కోసం కక్కుర్తి పడి..
మన్దీప్-జస్వీందర్ దంపతులు నేపాల్ వెళ్తున్నట్లు పోలీసులకు సమాచారం అందింది. ఈ క్రమంలో వారు హరిద్వార్‌, కేదార్‌నాథ్‌, హేమ్‌కుండ్‌ సాహెబ్‌ క్షేత్రాలను దర్శించనున్నట్లు దర్యాప్తు అధికారులకు తెలిసింది. హేమ్‌కుండ్‌ సాహెబ్‌కు నిత్యం వేలాది మంది సిక్కు యాత్రికులు వస్తుంటారు. వీరిలో మన్దీప్ కౌర్ను గుర్తించడం చాలా కష్టం. దీంతో యాత్రికులకు ఉచితంగా కూల్డ్రింక్ పంపిణీ ప్రణాళికను పోలీసులు అమలు చేశారు. ఈ క్రమంలో పోలీసులు ఊహించినట్లుగానే ఉచిత డ్రింకును తీసుకోవడానికి మన్దీప్ జంట ఆ స్టాల్‌ వద్దకు వెళ్లింది. అక్కడికి వెళ్లే సమయానికి ఈ జంట తమ ముఖాలు కనిపించకుండా కవర్‌ చేసుకున్నారు. కానీ, కూల్డ్రింక్ తాగేందుకు వారు ముఖంపై ఉన్న వస్త్రాన్ని తొలగించడం వల్ల పోలీసులు వారిని గుర్తించారు. అయినా.. ఏమీ తెలియనట్లు పోలీసులు మన్దీప్ కౌర్ దంపతులు ఎదుట నటించారు. హేమ్‌కుండ్‌ సాహెబ్‌లో మన్దీప్ కౌర్ దంపతులు ప్రార్థనలు చేసుకుని.. బయటకు వచ్చాక వారిని వెంబడించి పట్టుకున్నారు. ఈ ఆపరేషన్‌కు పోలీసులు 'లెట్స్‌ క్యాచ్‌ క్వీన్‌ బీ' (రాణీ తేనెటీగను పట్టుకొందాం) అని పేరు పెట్టారు. మన్దీప్ వద్ద నుంచి రూ.12 లక్షల నగదు, ఓ బైక్, ఆమె భర్త జస్వీందర్ సింగ్ నుంచి రూ.9 లక్షల నగదు స్వాధీనం చేసుకొన్నారు.
గతంలో బీమా ఏజెంట్‌గా పనిచేసిన మన్దీప్ కౌర్.. భారీగా అప్పులు చేసింది. ఈ ఏడాది ఫిబ్రవరిలో జస్వీందర్‌ను వివాహం చేసుకుంది. ధనవంతురాలిగా మారుదామనే ఉద్దేశంతోనే ఆమె సీఎంఎస్ సంస్థలో ఉద్యోగులను బందీలుగా చేసుకొని ఈ దోపిడీకి పాల్పడిందని పోలీసులు తెలిపారు. సీఎంఎస్ సంస్థ క్యాష్‌ మేనేజ్‌మెంట్‌ సేవలు అందిస్తుంది.
