బంగాల్​లో 80 శాతం- అసోంలో 73శాతం పోలింగ్​

18:15 April 01

బంగాల్, అసోం అసెంబ్లీ రెండో విడత ఎన్నికలు ముగిశాయి. సాయంత్రం ఆరు గంటల నాటికి బంగాల్​లో 80.43 శాతం ఓటింగ్ నమోదైంది.

అదేసమయంలో, అసోంలో 73.03 శాతం పోలింగ్ రికార్డైనట్లు భారత ఎన్నికల సంఘం వెల్లడించింది.

15:37 April 01

జోరుగా పోలింగ్​..

మధ్యాహ్నం 3.30 గంటల వరకు బంగాల్​లో 71 శాతం పోలింగ్​ నమోదైందని ఎన్నికల సంఘం ప్రకటించింది. అసోంలో 63 శాతానికిపైగా ఓటు హక్కు వినియోగించుకున్నారని వెల్లడించింది.

14:47 April 01

కోర్టుకెళ్తాం: దీదీ

రెండో విడత ఎన్నికలకు సంబంధించి ఈసీకి ఇప్పటివరకు 63 ఫిర్యాదులు చేసినట్లు టీఎంసీ అధినేత్రి మమతా బెనర్జీ తెలిపారు. ఇతర రాష్ట్రాల నుంచి వచ్చిన గూండాలు బంగాల్​లో విధ్వంసం సృష్టిస్తున్నారని ఆరోపించారు. ఈసీ చర్యలు తీసుకోకపోతే కోర్టుకు వెళ్తామని హెచ్చరించారు. 

14:41 April 01

'వారంతా బయటివారు'

టీఎంసీ అధినేత్రి మమతా బెనర్జీ నందిగ్రామ్​లోని ఓ పోలింగ్​ బూత్​ను సందర్శించారు. ఓటింగ్ సరళిని పరిశీలించారు.

ఈ సందర్భంగా నినాదాలు చేసినవారిపై మండిపడ్డారు మమత. వారంతా బయటి వ్యక్తులని ధ్వజమెత్తారు. బిహార్, ఉత్తర్​ప్రదేశ్ నుంచి వచ్చిన వారందరిని కేంద్ర బలగాలు రక్షిస్తున్నాయని ఆరోపించారు. 

13:08 April 01

బంగాల్​లో 58 శాతం పోలింగ్​..

బంగాల్​, అసోంలో రెండో దశ పోలింగ్​ కొనసాగుతోంది. మధ్యాహ్నం ఒంటిగంట వరకు బంగాల్​లో 58 శాతం, అసోంలో 48.26 శాతం ఓటింగ్​ నమోదైనట్లు ఎన్నికల సంఘం వెల్లడించింది.

12:05 April 01

బంగాల్​లో 37శాతం..

ఉదయం 11:31 గంటల వరకు బంగాల్​లో 37.4శాతం పోలింగ్​ నమోదైంది. కొన్ని ప్రాంతాల్లో చెదురుమొదురు ఘటనలు జరిగినప్పటికీ.. మిగిలిన ప్రాంతాల్లో పోలింగ్​ సాఫీగా సాగుతోంది.

11:47 April 01

పోలీసుల అదుపులో...

బంగాల్​ డెబ్రాలో భాజపా నేత మోహన్​ సింగ్​ను పోలీసులు అదుపులోకి తీసుకున్నారు. రెండో దశ పోలింగ్​ జరుగుతుండగా.. నియోజకవర్గంలోని ఓ పోలింగ్​ బూత్​కు సమీపంగా(100మీటర్ల) ఆయన వెళ్లిన కారణంగా అదుపులోకి తీసుకున్నారు పోలీసులు.

అయితే ఆ నియోజకవర్గం భాజపా అభ్యర్థి భారతి ఘోష్​ పిలవడం వల్లే తాను అక్కడికి వెళ్లినట్టు మోహన్​ వెల్లడించారు.

మోహన్​ను పోలీసులు తీసుకెళుతున్న సమయంలో భాజపా కార్యకర్తలు  ఆందోళనకు దిగారు. 

11:20 April 01

ఉదయం 11గంటల వరకు..

ఉదయం 11:17 గంటల వరకు అసోంలో 21.71శాతం, బంగాల్​లో 29.27శాతం పోలింగ్​ నమోదైంది. ఈ విషయాన్ని ఎన్నికల సంఘం వెల్లడించింది.

10:47 April 01

కేశ్​పుర్​లో...

కేశ్​పుర్​లో ఉద్రిక్త వాతావరణం నెలకొంది. బూత్​ నెం. 173 వద్ద భాజపా పోలింగ్​ ఏజెంట్​ను కేంద్రానికి వెళ్లనివ్వకుండా టీఎంసీ కార్యకర్తలు అడ్డుపడ్డారు. ఈ నేపథ్యంలో.. స్థానిక భాజపా నేత తన్మయ్​ ఘోష్​ వాహనాన్ని పలువురు ధ్వంసం చేశారు. స్వేచ్ఛాయుత పోలింగ్​కు టీఎంసీ అడ్డుపడుతోందని భాజపా ఆరోపించింది.

10:25 April 01

ఆందోళనలు..

బంగాల్​లోని ఘాటల్​ వద్ద సీపీఎం కార్యకర్తలు ఆందోళనకు దిగారు. ఓటు వేసేందుకు వెళుతుంటే.. టీఎంసీ కార్యకర్తలు తమను అడ్డుకుంటున్నారని ఆరోపించారు. ఈ క్రమంలో టైర్లను తగలబెట్టారు. ఘటనాస్థలానికి చేరుకున్న పోలీసులు పరిస్థితులను అదుపుచేశారు.

10:22 April 01

అజ్మల్​ ఓటు..

అసోంలోని హౌజైలో.. ఆల్​ ఇండియా యునైటెడ్​ డెమొక్రటిక్​ ఫ్రంట్​ అధ్యక్షుడు బాద్రుద్దిన్​ అజ్మల్​ తన ఓటు హక్కును వినియోగించుకున్నారు.

09:56 April 01

భాజపా కార్యకర్త మృతి..

నందిగ్రామ్​ పూర్వ భేకుతియాలో ఉరికి వేలాడుతూ ఓ భాజపా కార్యకర్త మృతదేహం లభించింది. టీఎంసీ కార్యకర్తలే హత్యచేశారని అతడి కుటుంబసభ్యులు ఆరోపించారు.

09:33 April 01

ఉదయం 9గంటల వరకు...

ఉదయం 9గంటల వరకు అసోంలో 10.51శాతం, బంగాల్​లో 13.14శాతం పోలింగ్​ నమోదైంది.

08:36 April 01

'టీఎంసీ...'

డెబ్రా నియోజకవర్గంలో భాజపా అభ్యర్థి భారతి ఘోష్​.. టీఎంసీపై తీవ్ర ఆరోపణలు చేశారు. తన ఎన్నికల ఏజెంట్​ పోలింగ్​​ బూత్​కు రానివ్వకుండా.. 150 టీఎంసీ గూండాలు చుట్టుముట్టినట్టు వెల్లడించారు. బరూనియాలో టీఎంసీ కార్యకర్తలు ఓటర్లను భయపెడుతున్నారని పేర్కొన్నారు.

08:09 April 01

నందిగ్రామ్​లో సువేందు అధికారి..

బంగాల్​ నందిగ్రామ్​ నియోజకవర్గంలో ఓటు హక్కును వినియోగించుకున్నారు భాజపా అభ్యర్థి సువేందు అధికారి. నందనాయకర్​ ప్రాథమిక పాఠశాల పోలింగ్​ బూత్​ నెం. 76 లో ఓటు వేశారు. అనంతరం మీడియాతో మాట్లాడారు. పెద్ద సంఖ్యలో ప్రజలు ఓటు వేసేందుకు రావాలని కోరారు. దేశమంతా నందిగ్రామ్ నియోజకవర్గం​ వైపే చూస్తోందని పేర్కొన్నారు. అభివృద్ధి కోసం ప్రజలు ఎదురు చూస్తున్నారని అన్నారు.  

07:31 April 01

ప్రధాని ట్వీట్​..

రెండో విడత పోలింగ్​ నేపథ్యంలో ప్రధానమంత్రి నరేంద్ర మోదీ ట్వీట్​ చేశారు. అసోంలో ప్రతి ఒక్కరూ తమ ఓటు హక్కును వినియోగించుకోవాలని పిలుపునిచ్చారు. బంగాల్​ ప్రజలు రికార్డు స్థాయిలో ఓట్లు వేయాలని కోరారు. 

07:22 April 01

నందిగ్రామ్​లో..

నందిగ్రామ్​వాసులు తమ ఓటు హక్కును వినియోగించుకునేందుకు పోలింగ్​ కేంద్రాలకు తరలివెళుతున్నారు. పోలింగ్​ మొదలైన కాసేపటికే.. పోలింగ్​ కేంద్రాల వద్ద బారులుతీరారు ఓటర్లు. యువకుల నుంచి వృద్ధుల వరకు క్యూలో నిలబడి తమ ఓటు హక్కును వినియోగించుకుంటున్నారు.

నందిగ్రామ్​ నుంచి బరిలో దిగిన నాటి మిత్రులు-నేటి శత్రువులు మమతా బెనర్జీ-సువేందు అధికారి పోరులో ప్రజలు ఎవరిని గెలిపిస్తారనేది సర్వత్రా ఆసక్తిగా మారింది.

06:53 April 01

పోలింగ్​ ప్రారంభం...

బంగాల్, అసోంలో.. రెండో విడత పోలింగ్​ ప్రారంభమైంది. ఓటు వేసేందుకు ఇప్పటికే పలు కేంద్రాల్లో ప్రజలు బారులు తీరారు. ఉదయం 7 గంటలకు మొదలైన పోలింగ్​.. సాయంత్రం 6 గంటల వరకు సాగనుంది.

కొవిడ్​ నిబంధనలు- పటిష్ఠ భద్రతా ఏర్పాట్ల మధ్య రెండో దశ పోలింగ్​ సాగనుంది. ఇందుకోసం అధికారులు ముమ్మర ఏర్పాట్లు చేశారు.

06:42 April 01

నందిగ్రామ్​లో తుది ఏర్పాట్లలో అధికారులు

ఏర్పాట్లు పూర్తి చేస్తున్న అధికారులు

బంగాల్​, అసోంలో చివరి నిమిషం వరకు పోలింగ్​ ఏర్పాట్లు జరుగుతున్నాయి. బంగాల్​ నందిగ్రామ్​ నియోజకవర్గంలోని పోలింగ్​ కేంద్రంలో అధికారులు.. ఏర్పాట్లను ముమ్మరం చేశారు.

అసోంలోని పలు కేంద్రాల్లో ప్రజలు ఇప్పటికే పోలింగ్​ కేంద్రాలకు చేరుకుని ఓటు హక్కును వినియోగించుకునేందుకు ఎదురుచూస్తున్నారు.

06:23 April 01

పోలింగ్​ లైవ్​ అప్​డేట్స్​

బంగాల్, అసోంలో.. రెండో విడత పోలింగ్​కు సర్వం సిద్ధమైంది. అసోంలో 39, బంగాల్​లో 30 అసెంబ్లీ స్థానాలకు ఉదయం 7 గంటల నుంచి ఓటర్లు తమ ఓటు హక్కును వినియోగించుకోనున్నారు. పోలింగ్ సాయంత్రం 6 గంటల వరకు కొనసాగనుంది.  

అసోంలో మొత్తం 126 నియోజకవర్గాలు ఉండగా మూడు విడతల్లో ఎన్నికలు జరగనున్నాయి. 47 స్థానాలకు గత నెల 27న తొలివిడత ఓటింగ్ జరిగింది.

బంగాల్​లో 8 విడతల సుదీర్ఘ ఎన్నికల ప్రక్రియలో భాగంగా తొలి దశలో 30 స్థానాల్లో పోలింగ్ గత నెల 27న జరగింది. తాజాగా జరగనున్న పోలింగ్​లో అందరి దృష్టి నందిగ్రామ్​ నియోజకవర్గంపైనే ఉంది. సీఎం మమతా బెనర్జీ- భాజపా నేత సువేందు అధికారి ఈ నియోజకవర్గం నుంచి బరిలో దిగడం ఇందుకు కారణం.