'డ్రోన్​ దాడి ఆ ఉగ్ర సంస్థ పనే'

జమ్ములో వైమానిక స్థావరంపై దాడికి పాల్పడింది ఉగ్రసంస్థ లష్కరే తొయిబా అని అనుమానిస్తున్నారు అధికారులు. పాక్​ నుంచే ఆ డ్రోన్లు వచ్చాయని భావిస్తున్నట్లు వెల్లడించారు.

జమ్ములో వాయుసేన స్థావరంపై డ్రోన్ దాడి.. ఉగ్రసంస్థ లష్కరే తొయిబా పనే అని అధికారులు అనుమానిస్తున్నారు. ఆదివారం ఉదయం డ్రోన్లు సరిహద్దు ఆవల నుంచే వచ్చాయని భావిస్తున్నట్లు జమ్ముకశ్మీర్​ డీజీపీ దిల్​బాగ్​ సింగ్​ తెలిపారు. పూర్తి స్థాయి దర్యాప్తు జరుగుతోందని, త్వరలోనే అన్ని వివరాలు తెలుస్తాయని చెప్పారు.

ఆదివారం తెల్లవారుజామున వైమానిక స్థావరంపై ముష్కరులు డ్రోన్ల ద్వారా దాడులు జరపగా ఇద్దరు జవాన్లు గాయపడ్డారు. డ్రోన్​ కాక్​టైల్ భాగంలో ఆర్డీఎక్స్​ను పేలుడుకు ఉపయోగించినట్లు అధికారులు అనుమానిస్తున్నారు. మంగళవారమే ఈ కేసును జాతీయ దర్యాప్తు సంస్థ (ఎన్ఐఏ)కు అప్పగించారు.

జమ్ములో ఎలాంటి అవాంఛనీయ ఘటనలు జరగకుండా అధికారులు చర్యలు తీసుకుంటున్నారు. అనుమానాస్పద ప్రాంతాల్లో వరుసగా సోదాలు జరుగుతున్నాయి. అనధికారికంగా ఎలాంటి డ్రోన్​లను వాడకూడదని ప్రజలకు హెచ్చరికలు జారీ చేశారు.

ఇదీ చదవండి:జమ్ములో మళ్లీ డ్రోన్ల కలకలం​- సైన్యం అప్రమత్తం