'లఖింపుర్​' కేసులో యూపీ ప్రభుత్వానికి సుప్రీం డెడ్​లైన్​!

లఖింపుర్​ ఖేరి హింస (Lakhimpur Kheri violence) ఘటన కేసు దర్యాప్తు పర్యవేక్షణ అంశంపై వైఖరిని తెలపాలని ఉత్తర్​ప్రదేశ్​ ప్రభుత్వానికి గడువు పొడగించింది సుప్రీం కోర్టు. రాష్ట్ర ప్రభుత్వ అభ్యర్థన మేరకు కేసు విచారణను సోమవారానికి వాయిదా వేసింది.

లఖింపుర్​ ఖేరి హింసాత్మక(Lakhimpur Kheri violence) ఘటనపై శుక్రవారం విచారణ చేపట్టింది సుప్రీం కోర్టు(Supreme court). సిట్​ దర్యాప్తు పర్యవేక్షణకు వేరే రాష్ట్రాల హైకోర్టు మాజీ న్యాయమూర్తుల నియామకం అంశంపై తమ వైఖరి తెలిపేందుకు ఉత్తర్​ప్రదేశ్​ ప్రభుత్వానికి సోమవారం(నవంబర్​ 15) వరకు గడువు ఇచ్చింది.

లఖింపుర్​ ఘటనను సుమోటాగా స్వీకరించి విచారణ జరుపుతోంది భారత ప్రధాన న్యాయమూర్తి జస్టిస్​ ఎన్​వీ రమణ(Chief Justice N V Ramana) నేతృత్వంలోని ధర్మాసనం. ఈ సందర్భంగా యూపీ ప్రభుత్వం తరఫున గడువు కోరారు సీనియర్​ న్యాయవాది హరీష్​ సాల్వే. 'సోమవారం వరకు సమయం ఇవ్వండి. ఈ అంశంపై దాదాపు పని పూర్తి చేశాం. ఇంతర అంశాలను సైతం పరిశీలిస్తున్నాం.' అని తెలిపారు.

న్యాయవాది అభ్యర్థన మేరకు విచారణను వాయిదా వేసిన ధర్మాసనం.. సోమవారం తమ వైఖరి తెలపాలని స్పష్టం చేసింది.

ఇదీ కేసు..

అక్టోబర్​ 3న జరిగిన లఖింపుర్ హింసాత్మక ఘటనలో(lakhimpur kheri violence) నలుగురు రైతులు సహా మొత్తం 8 మంది ప్రాణాలు కోల్పోయారు. కేంద్రమంత్రి అజయ్ మిశ్రా కారు.. నిరసన తెలుపుతున్న రైతులపైకి దూసుకెళ్లిన ఈ ఘటన దేశవ్యాప్తంగా దుమారం రేపింది. ఈ ఘటనలో ఆరోపణలు ఎదుర్కొంటున్న అజయ్ మిశ్రా కుమారుడు అశిష్​ మిశ్రాను పోలీసులు అరెస్టు చేశారు.

ఇదీ చూడండి:'హైకోర్టు మాజీ జడ్జి పర్యవేక్షణలో లఖింపుర్ కేసు విచారణ'