'కుంభమేళా భక్తుల నుంచి కరోనా ప్రసాదం!'

కుంభమేళా భక్తులు కరోనా వైరస్​ను ప్రసాదంలా పంచిపెడతారని అభ్యంతరకర రీతిలో వ్యాఖ్యలు చేశారు ముంబయి మేయర్. రాష్ట్రంలోకి రాగానే వారిని క్వారంటైన్​కు పంపిస్తామని స్పష్టం చేశారు.

హరిద్వార్​లో జరుగుతున్న కుంభమేళాలో కరోనా కేసులు వెలుగుచూస్తున్న వేళ ముంబయి మేయర్ కిశోరీ పెడ్నేకర్ అభ్యంతరకర వ్యాఖ్యలు చేశారు. కుంభమేళా భక్తులు కరోనా వైరస్​ను ప్రసాదంలా అందరికి పంచుతారని అన్నారు. ఈ భక్తులను భాజపా ప్రేరేపిస్తోందని ఆరోపించారు.

కరోనా మరింత వ్యాపించకుండా నివారించేందుకు కుంభమేళా భక్తులను క్వారంటైన్​కు పంపిస్తామని మేయర్ పెడ్నేకర్ వెల్లడించారు. క్వారంటైన్ ఖర్చులను భక్తులే భరించాలని స్పష్టం చేశారు.

ముంబయిలో కరోనా వ్యాప్తి పెరుగుతోందని, అయినప్పటికీ ప్రజలు సమూహాలుగా ఏర్పడటం తగ్గలేదని అన్నారు పెడ్నేకర్. "నగరంలో పడకల సంఖ్యను 19 వేల నుంచి 25 వేలకు పెంచాం. 6 జంబో సెంటర్లను ఏర్పాటు చేశాం. కరోనా బాధితుల సంఖ్య పెరుగుతుండటం వల్ల ఈ వసతులు సరిపోవడం లేదు. కాబట్టి ప్రజలు బయటకు వెళ్లొద్దు. లాక్​డౌన్ కావాలో వద్దో ప్రజలే నిర్ణయించుకోవాలి" అని పేర్కొన్నారు.

ఇదీ చదవండి:'దేశంలో హెల్త్​ ఎమర్జెన్సీ ప్రకటించండి'