వాళ్లలా మనకెప్పుడు మాస్క్ నుంచి విముక్తి ?

ప్రపంచవ్యాప్తంగా పలు దేశాలు కరోనాపై విజయం సాధించి.. తమ ప్రజలు మాస్కు ధరించాల్సిన అవసరం లేదని చెప్పి విముక్తి కల్పించాయి. అందరూ టీకా రెండు డోసులు తీసుకోకముందే ఈ ప్రకటన చేశాయి. భారత్​లో మాత్రం కరోనా ఉద్ధృతి ఇంకా ఆందోళనకరంగా ఉంది. మనకెప్పుడు మాస్కు నుంచి విముక్తి లభిస్తుందోనని అందరి మదిలో సందేహం నెలకొంది. దీనిపై ప్రముఖ వైద్యులు రాజీవ్​ సూద్ ఏం చెబుతున్నారో చూద్ధాం.

భారత్​లో కరోనా రెండో దశ ఎవరూ ఊహించని రీతిలో విధ్వంసం సృష్టిస్తోంది. రోజుకు లక్షల్లో కేసులు, వేల సంఖ్యలో మరణాలు సంభవించి ఆందోళనకర పరిస్థితులు నెలకొన్నాయి. ముఖానికి మాస్క్ లేనిదే బయటకు వెళ్లలేని పరిస్థితి. అయితే ప్రపంచంలోని పలు దేశాల్లో మాత్రం పరిస్థితి ఇందుకు భిన్నం. ప్రజలు ఇక మాస్కులు ధరించాల్సిన అవసరం లేదని ప్రభుత్వాలే ప్రకటించాయి. మాస్క్​ నుంచి విముక్తిని ప్రసాదించాయి.

భారత్​లో కూడా ఆ పరిస్థితి ఎప్పుడు వస్తుందా? అని ప్రజలంతా ఆశగా ఎదురుచూస్తున్నారు. దీనిపై అటల్ బిహారి వాజ్​పేయీ వైద్య కళాశాల డీన్​ రాజీవ్ సూద్​ ఏమంటున్నారో చూద్దాం.

సగం మందికి పైగా..

అమెరికా లాంటి దేశాల్లో దాదాపు సగం మందికిపైగా వ్యాక్సిన్ వేసినందు వల్ల హెర్డ్ ఇమ్యూనిటీ సాధ్యమైందని రాజీవ్ సూద్​ తెలిపారు. అందుకే ప్రజలు ఒంటరిగా ఉన్నప్పుడు మాస్క్ ధరించవద్దని ప్రకటించారని వివరించారు. బహిరంగ ప్రదేశాల్లో మాత్రం మాస్కు ధరించాలనే నిబంధన ఉందని గుర్తు చేశారు. కార్యాలాయాల్లో అందరూ వ్యాక్సిన్ వేయించుకుంటేనే మాస్కు అవసరం లేదని అమెరికా ప్రభుత్వం చెప్పిందన్నారు.

"భారత్​లో ఇప్పటి వరకు కేవలం 18 కోట్ల మందికే టీకా వేశారు. సగం జనాభాకు వ్యాక్సినేషన్​ పూర్తయ్యే వరకు మాస్క్ ధరించక తప్పదు. అందుకు డిసెంబర్​ వరకు వేచి చూడాల్సిందే. దేశంలో వ్యాక్సినేషన్ వేగాన్ని పెంచాల్సిన అవసరం ఉంది. అందరికీ టీకాలు వేస్తేనే హెర్డ్​ ఇమ్యూనిటీ వస్తుంది. దేశంలో 60-70 శాతం మందికి టీకా వేసినప్పుడే వైరస్ వ్యాప్తి చెందే ముప్పు తగ్గుతుంది. వ్యాక్సిన్ల దిగుమతిని పెంచి సాధ్యమైనంత త్వరగా ప్రజలందరికీ టీకా ఇవ్వాలి.

డా. రాజీవ్ సూద్​

కేసుల తగ్గుదలకు కారణం అదే..

కొద్దిరోజులుగా దేశంలో కరోనా కేసుల సంఖ్య తగ్గడానికి ఆయా రాష్ట్రాల్లో లాక్​డౌన్ విధించడమేనని నిపుణులు చెబుతున్నారు. సీరో సర్వే ప్రకారం దేశంలో 30 నుంచి 40 శాతం మందిలో యాంటీబాడీస్​ ఉత్పత్తి అయ్యాయని, దీంతో పాటు కరోనా బారిన పడి కోలుకున్న వారి ద్వారా హెర్డ్ ఇమ్యూనిటీ పెరగడం వల్ల ఇది సాధ్యమైందని అసోసియేషన్​ ఆఫ్ హెల్త్​ కేర్​ ప్రొవైడర్స్​(ఏహెచ్​సీపీ) డైరెక్టర్ జనరల్​ డా.గిరిధన్ గ్యానీ తెలిపారు.