అసెంబ్లీపై ఖలిస్థాన్​ జెండాలు ప్రత్యక్షం.. పోలీసులు హైఅలర్ట్​

Khalistan Flags Found in Assembly: హిమాచల్​ ప్రదేశ్​ తపోవన్​లోని అసెంబ్లీపై ఖలిస్థాన్ జెండాలు ప్రత్యక్షమయ్యాయి. ఎవరో దుండగులు.. విధానసభ గేటుకు, గోడలకు జెండాలు అంటించారు. స్థానికుల సమాచారంతో పోలీసులు అప్రమత్తమయ్యారు. ఈ ఘటనను పిరికిపంద చర్యగా అభివర్ణించారు సీఎం జైరాం ఠాకుర్​.

Khalistan Flags Found in Assembly: హిమాచల్ ​ప్రదేశ్​ అసెంబ్లీ ముందు కలకలం రేగింది. తపోవన్​లోని విధానసభ ప్రధాన ద్వారం వద్ద ఖలిస్థాన్​ జెండాలు దర్శనమిచ్చాయి. కొందరు దుండగులు అసెంబ్లీ గేటుకు జెండాలు వేలాడదీయడమే కాకుండా.. గోడలపైనా ఖలిస్థానీ నినాదాలు రాశారు. గమనించిన స్థానికులు పోలీసులకు సమాచారం అందించగా.. వారు ఘటనా స్థలానికి చేరుకొని జెండాలను తీసివేశారు. శనివారం అర్ధరాత్రి లేదా ఆదివారం ఉదయం ఈ దుశ్చర్యకు పాల్పడి ఉంటారని అనుమానిస్తున్నారు.

.

అసెంబ్లీ గేటు ముందు సీసీటీవీ లేకపోవడం గమనార్హం. అయితే.. సమీపంలోని సీసీటీవీ ఫుటేజీలను పరిశీలిస్తున్నారు పోలీసులు. నిందితులపై కఠిన చర్యలు తీసుకుంటామని స్పష్టం చేశారు. గత మార్చిలో సిఖ్​ ఫర్​ జస్టిస్​ అధ్యక్షుడు గురుపత్​వంత్​ సింగ్​.. ముఖ్యమంత్రి జైరాం ఠాకుర్​కు బెదిరింపు లేఖ రాశారు. శిమ్లాలో ఖలిస్థాన్​ జెండాలు ఎగురవేస్తామని అన్నారు. ఈ నేపథ్యంలో ఇది వీరి పనే అయి ఉంటుందని పోలీసులు అనుమానిస్తున్నారు. అన్ని కోణాల్లో ఘటనపై దర్యాప్తు చేస్తున్నారు.

గోడలపై ఖలిస్థాన్​ జెండాలు, నినాదాలు

ఖండించిన సీఎం:ఈ ఘటనను ఖండించారు సీఎం జైరాం ఠాకుర్​. ఇదో పిరికిపంద చర్యగా అభివర్ణించారు. దీనిపై దర్యాప్తు జరిపి.. నిందితులను కఠినంగా శిక్షిస్తామని ట్వీట్​ చేశారు. ఈ విధానసభలో కేవలం శీతాకాల సమావేశాలే జరుగుతాయని, భద్రతను కట్టుదిట్టం చేయాల్సిన అవసరం ఉందని అన్నారు. ఇతర రాష్ట్రాలతో సరిహద్దుల్లో భద్రతకు సంబంధించి త్వరలో సమీక్ష నిర్వహించనున్నట్లు తెలిపారు.

ఇవీ చూడండి:ప్రేమకు నిరాకరించిందని మూడంతస్తుల భవనానికి నిప్పు.. 9 మంది మృతి