Kerala Road Accident : కేరళ వయనాడ్లో జరిగిన ఘోర రోడ్డు ప్రమాదంలో 9 మంది మహిళా కూలీలు మరణించారు. ఓ జీపు అదుపుతప్పి 25 మీటర్ల లోతున్న లోయలో పడిపోయింది. ఈ ప్రమాదంలో టీ ఎస్టేట్లో పని చేసే 9 మంది కూలీలు చనిపోగా.. మరో నలుగురికి తీవ్ర గాయాలయ్యాయి. ఈ ప్రమాదం శుక్రవారం మధ్యాహ్నం 3.30 గంటల సమయంలో తళప్పుజాలోని కన్నోత్ హిల్ వద్ద జరిగింది. ఈ ఘటనపై సమాచారం అందుకున్న పోలీసులు.. ఘటనా స్థలానికి చేరుకుని సహాయక చర్యలు చేపట్టారు. గాయపడిన వారిని మనంతవాడీ మెడికల్ కాలేజీకి తరలించి చికిత్స అందిస్తున్నారు. మృతులను టీ ఎస్టేట్లో పనిచేసే రాణి, శాంత, శోభన, మార్యక్క, వసంత, రబియా, చిన్నమ్మ, షాజా, లీలాగా గుర్తించారు పోలీసులు. వీరంతా వయనాడ్ జిల్లాకు చెందినవారిగా గుర్తించారు.
Kerala Jeep Accident : పరిమితికి మించి వాహనంలో ప్రయాణికులను ఎక్కించడమే ప్రమాదానికి కారణమని పోలీసులు ప్రాథమికంగా అంచనా వేశారు. లోయలో భారీగా రాళ్లు ఉండడం వల్ల.. కూలీల తలలకు తీవ్ర గాయాలై మృతి చెందారని వివరించారు. సహాయక చర్యల్లో స్థానికులు పాల్గొని.. క్షతగాత్రులను రోడ్డుపైకి తీసుకువచ్చారు. ప్రమాద సమాచారం తెలుసుకున్న జిల్లా కలెక్టర్.. ఘటనా స్థలానికి చేరుకుని సహాయక చర్యలను పర్యవేక్షించారు.