వరకట్నానికి వ్యతిరేకంగా గవర్నర్​ నిరాహార దీక్ష

కేరళ గవర్నర్​ ఆరిఫ్​ మహమ్మద్​ ఖాన్​.. వరకట్నానికి వ్యతిరేకంగా నిరాహార దీక్ష చేపట్టారు. వరకట్న వేధింపులను నిరసిస్తూ వివిధ గాంధేయవాద సంస్థలు ఆయనకు మద్దతుగా పలు ప్రాంతాల్లో నిరసనలు చేపట్టాయి.

వరకట్న రక్కసిని రూపుమాపాలని కోరుతూ.. కేరళ గవర్నర్​ ఆరిఫ్​ మహమ్మద్​ ఖాన్​ బుధవారం నిరాహార దీక్ష చేపట్టారు. ఉదయం 8 గంటలకు ఆయన నివాసంలో ఈ​ దీక్ష చేపట్టారు. వరకట్న వేధింపులకు వ్యతిరేకంగా వివిధ గాంధేయవాద సంస్థలు ఆయనకు మద్దతుగా దీక్ష చేపట్టాయి. తిరువనంతపురంలోని గాంధీభవన్​లో ఈ నిరసనలను ప్రారంభించాయి.

గవర్నర్​.. సాయంత్రం 4 గంటలకు ఈ నిరాహార దీక్షను విరమిస్తారు. అనంతరం.. గాంధీభవన్​లో నిర్వహిస్తున్న నిరసనల్లో పాల్గొంటారు. ఈ కార్యక్రమం సాయంత్రం 6 గంటలకు ముగుస్తుంది.

వరకట్న వేధింపుల కారణంగా ఇటీవల వరుస ఆత్మహత్య ఘటనలు చోటుచేసుకున్నాయి. పలువురు మహిళల వరకట్న వేధింపులు తాలలేక మృతి చెందటంపై దిగ్భ్రాంతి వ్యక్తం చేశారు గవర్నర్​. వరకట్న సంప్రదాయాన్ని రూపుమాపేందుకు తాను స్వచ్ఛందంగా పనిచేసేందుకు సిద్ధమని గవర్నర్​ ప్రకటించారు. ఈ క్రమంలో బుధవారం దీక్ష చేపట్టారు.

ఇదీ చదవండి :'సైన్యంలో చేరేలా యువతకు అవగాహన కల్పించాలి'