'మమ్మల్ని గెలిపిస్తే నెలకు రూ.6వేలు సాయం'

కేరళలో యూడీఎఫ్​ను గెలిపిస్తే పేదలకు న్యాయ్​ పథకం కింద ప్రతినెల ఆరు వేల రూపాయలను ఇస్తామని హామీ ఇచ్చారు కాంగ్రెస్​ నేత రాహుల్​ గాంధీ. వయనాడ్​లోని తిరునెళ్లి దేవాలయంలో ఆయన ప్రత్యేక పూజలు చేశారు.

న్యాయ్​ పథకం ద్వారా కేరళలోని పేదలకు ప్రతినెల రూ.6వేల అందిస్తామని హామీ ఇచ్చారు కాంగ్రెస్​ నేత రాహుల్​ గాంధీ. యూడీఎఫ్​ కూటమి విప్లవాత్మకమైన, ఇదివరకు దేశంలో ఎక్కడా అమలు చేయని పథకాన్ని ప్రతిపాదించిందన్నారు. వయనాడ్​ నియోజకవర్గంలోని తిరునెళ్లిలో ఆదివారం పర్యటించిన సందర్భంగా ఈ వ్యాఖ్యలు చేశారు.

'కేరళలోని పేదలకు ప్రతినెల రూ.6000 చొప్పున ఏడాదికి రూ.72వేలు అందిస్తాము. ఈ డబ్బును నేరుగా వారి బ్యాంకు ఖాతాల్లో వేస్తాము' అని రాహుల్​ స్పష్టం చేశారు.

హిందూ దేవాలయంలో రాహుల్​ గాంధీ

తిరునెళ్లి పర్యటన సందర్భంగా స్థానిక మహావిష్ణు ఆలయాన్ని సందర్శించి ప్రత్యేక పూజలు చేశారు రాహుల్. అనంతరం కల్​పెట్ట ప్రాంతంలోని జీవన్​ జ్యోతి అనాథాశ్రమంలో నిర్వహించిన ఈస్టర్​ వేడుకల్లో పాల్గొన్నారు. చిన్నారులతో కలిసి భోజనం చేశారు. ఈ క్రమంలో పలువురు బాలికలు రాహుల్​ గాంధీ సోదరి ప్రియాంక వాద్రాతో వీడియో కాల్​ ద్వారా ముచ్చటించారు.

కేరళలో అసెంబ్లీ ఎన్నికలు ఏప్రిల్ ​6న జరగనున్నాయి. ఫలితాలు మే 2న వెలువడతాయి.

ఇదీ చదవండి:విజయన్‌ చరిత్ర సృష్టిస్తారా?