Kejriwal ED Case : దిల్లీ మద్యం కేసులో ఎన్ఫోర్స్ మెంట్ డైరెక్టరేట్-ఈడీ పంపిన నోటీసులు చట్ట విరుద్ధమనీ.. రాజకీయ ప్రేరేపితమైనవని ఆ రాష్ట్ర ముఖ్యమంత్రి అరవింద్ కేజ్రీవాల్ అన్నారు. బీజేపీ ఆదేశాల మేరకే తనకు ఈడీ నోటీసు పంపిందని ఆరోపించారు. త్వరలో నాలుగు రాష్ట్రాల్లో జరగనున్న ఎన్నికల ప్రచారానికి తనను వెళ్లకుండా అడ్డుకునేందుకే నోటీసు వచ్చిందని పేర్కొన్నారు. ఈడీ వెంటనే నోటీసును ఉపసంహరించుకోవాలని కేజ్రీవాల్ డిమాండ్ చేశారు. మరోవైపు, ఈడీ విచారణకు కేజ్రీవాల్ గైర్హాజరవుతారని ఆప్ వర్గాలు వెల్లడించాయి. మధ్యప్రదేశ్లో జరగనున్న ఎన్నికల రోడ్షోలో పంజాబ్ సీఎం భగవంత్ మాన్తో కలిసి ఆయన పాల్గొంటారని తెలిపాయి. మరోవైపు, ఈడీ మళ్లీ కేజ్రీవాల్కు సమన్లు జారీ చేయనున్నట్లు తెలుస్తోంది.
వాస్తవానికి గురువారం (నవంబర్‌ 2న) కేజ్రీవాల్ ఈడీ కార్యాలయంలో హాజరుకావాల్సి ఉంది. ఈ క్రమంలో ఆయనకు సమన్లు జారీచేయడాన్ని వ్యతిరేకిస్తూ ఈడీ కార్యాలయం సమీపంలో ఆప్ కార్యకర్తలు గుమిగూడకుండా భారీగా భద్రతా ఏర్పాట్లు చేశారు పోలీసులు. తుగ్లక్‌ రోడ్డులోని ఈడీ కార్యాలయం వద్ద పోలీసు యంత్రాంగం పలు వరుసల్లో బారీకేడ్లను ఏర్పాటు చేసింది. భారీ సంఖ్యలో పోలీసులు, పారా మిలిటరీ బలగాలను మోహరించినట్లు అధికారులు తెలిపారు. డీడీయూ మార్గ్‌లోని బీజేపీ కార్యాలయానికి వద్ద, ఐటీఓ ప్రాంతంలోని ఆప్ కార్యాలయం వద్ద భద్రతను కట్టుదిట్టం చేశారు. దీంతో ఇండియా గేట్‌, వికాస్ మార్గ్‌, ఐటీఓ ప్రాంతంలో కొద్దిమేర ట్రాఫిక్‌కు అంతరాయం కలిగింది. కేజ్రీవాల్.. రాజ్ఘాట్ వద్ద నివాళి అర్పించేందుకు వెళ్లే అవకాశం ఉన్నట్లు తెలియడం వల్ల అక్కడ కూడా పోలీసులు భద్రతను పెంచారు.
మద్యం కుంభకోణం కేసు దర్యాప్తులో భాగంగా గురువారం ఉదయం 11 గంటలకు తమ ఎదుట హాజరు కావాలంటూ కేజ్రీవాల్కు ఈడీ అధికారులు సోమవారం సమన్లు జారీ చేశారు. ఈ కేసులో కేజ్రీవాల్కు ఈడీ సమన్లు ఇవ్వడం ఇదే తొలిసారి. అంతకుముందు ఈ ఏడాది ఏప్రిల్లో సీబీఐ.. ఆయనను మద్యం కుంభకోణం కేసులో కొన్ని గంటల పాటు ప్రశ్నించింది.
'మద్యం స్కామ్లో ప్రధాన సూత్రధారి కేజ్రీనే!'
కేజ్రీవాల్కు ఈడీ సమన్లు జారీచేయడంపై బీజేపీ నేత హరీశ్ ఖురానా స్పందించారు. "చట్టం తన పని తాను చేసుకుపోతోంది. చట్ట ప్రకారమే కేజ్రీవాల్కు ఈడీ సమన్లు జారీ చేసింది. మనీశ్ సిసోదియా బెయిల్ విచారణ జరిగిన సమయంలో రూ.338 కోట్ల నగదు బదిలీ జరిగినట్లు ఈడీ ఆధారాలు చూపిందని సుప్రీంకోర్టు చెప్పింది. ఇప్పుడు కేజ్రీవాల్ అందుకు సమాధానం చెప్పాలి. 5 శాతం నుంచి 12 శాతానికి ఎక్సైజ్ సుంకాన్ని ఎందుకు పెంచారో చెప్పాలి. స్కామ్ లేకపోతే సిసోదియా బెయిల్ పిటిషన్ ఆరుసార్లు ఎందుకు తిరస్కరణకు గురవుతుంది? స్కామ్ ప్రధాన సూత్రధారి అరవింద్ కేజ్రీవాల్" అని హరీశ్ ఖురానా ఆరోపించారు.