Karnataka Covid Home Isolation :రాష్ట్రంలో కొవిడ్ కేసులు పెరుగుతున్న క్రమంలో పాజిటివ్ రోగులకు ఏడు రోజుల హోమ్ ఐసోలేషన్ తప్పనిసరి చేసింది కర్ణాటక ప్రభుత్వం. మంగళవారం ఒక్కరోజులోనే 74 కొత్త కేసులు నమోదైన నేపథ్యంలో ఈ నిర్ణయం తీసుకుంది. ఈ మేరకు సమావేశమైన కర్ణాటక క్యాబినెట్ సబ్ కమిటీ, ప్రజలందరూ మాస్కులు ధరించాలని సూచించింది. కరోనా లక్షణాలు ఉన్న పిల్లలను పాఠశాలలకు పంపించరాదని చెప్పింది. కొవిడ్ కేసుల పెరుగుదల, JN.1 వేరియంట్ కేసులు పెరుగుతున్న నేపథ్యంలో భౌతిక దూరం, ఏడు రోజుల హోమ్ ఐసోలేషన్ వంటివి పాటించాలని సూచించింది. కర్ణాటక ఆరోగ్య విభాగం విడుదల చేసిన హెల్త్ బులిటెన్ ప్రకారం బుధవారం నాటికి 464 క్రియాశీల కేసులు నమోదయ్యాయి. కొవిడ్ పాజిటివ్ నిర్ధరణ అయివారిని హోమ్ ఐసోలేషన్లో ఉంచారు. వారి ఆరోగ్యాన్ని అధికారులు నిశితంగా పర్యవేక్షిస్తున్నారు.
Covid Cases In India Today :దేశంలో బుధవారం ఉదయం 8 గంటల నుంచి గురువారం ఉదయం 8 గంటల వరకు 702 కొత్త కొవిడ్ కేసులు నమోదయ్యాయని కేంద్ర ఆరోగ్య మంత్రిత్వశాఖ గురువారం తెలిపింది. దీంతో క్రీయాశీల కేసుల సంఖ్య 4,097కి చేరిందని చెప్పింది. మొత్తం ఆరుగురు (మహారాష్ట్ర(2), కర్ణాటక (1), కేరళ (1), బంగాల్ (1), దిల్లీలో ఒకరు మృతిచెందారని తెలిపింది.
అయితే డిసెంబరు 5 నాటికి రోజువారీ కేసుల సంఖ్య తగ్గింది. కొత్త వేరియంట్, చల్లని వాతావరణ పరిస్థితుల కారణంగా కొవిడ్ కేసులు మళ్లీ పెరిగాయి. కేంద్ర ఆరోగ్యశాఖ వెబ్‌సైట్ ప్రకారం కొవిడ్ వైరస్ బారి నుంచి 4.4 కోట్ల మంది కోలుకున్నారు. ప్రస్తుతం రికవరీ రేటు 98.81 శాతంగా ఉంది. దేశంలో ఇప్పటివరకు 220.67 కోట్ల కొవిడ్ టీకాలు వేశారు. మరోవైపు, బుధవారం దిల్లీలో మొదటి జేఎన్.1 వేరియంట్ కేసు నమోదైంది. ఈ మేరకు దిల్లీ ఆరోగ్య శాఖ మంత్రి సౌరభ్ భరద్వాజ్ తెలిపారు.