గడియారంపై ప్రేమతో.. 400హెచ్​ఎంటీ వాచ్​ల సేకరణ!

సాధారణంగా ఒక్కొక్కరికి ఒక్కో అభిరుచి ఉంటుంది. తమకిష్టమైన పనులు చేస్తూ.. అనుభూతిని పొందుతుంటారు. అలాంటి కోవకు చెందిన వారే కర్ణాటకకు చెందిన ఓ ఉపాధ్యాయుడు. గడియారాలంటే అమితంగా ఇష్టపడే ఆయన.. ఇప్పటివరకు ఏకంగా 400పైగా హెచ్​ఎంటీ బ్రాండ్​ వాచ్​లను సేకరించి వాటిపై తన అభిమానాన్ని చాటుకున్నారు.

కర్ణాటక చామరాజనగర్​కు చెందిన పొన్నాచి మహదేవ స్వామి.. చేతి గడియారాలంటే అమితంగా ఇష్టపడతారు. వృత్తిపరంగా ఉపాధ్యాయుడైన ఆయన.. వాచ్​లపై అభిమానంతో హోరాలజిస్ట్​(గడియారాల సేకరించే వారు) అయ్యారు. యుక్త వయసు నుంచే హెచ్ఎంటీ బ్రాండ్​ను అమితంగా ఇష్టపడే ఆయన.. ఆ అభిరుచితో ఇప్పటివరకు 400 హెచ్ఎంటీ వాచ్​లను సేకరించారు.

400కుపైగా వాచ్​లతో..

హనూర్​ తాలుకా ప్రాంతానికి చెందిన మహదేవస్వామి.. యలందూర్​లోని ఓ పాఠశాలలో రిసోర్స్​ విభాగంలో ఉపాధ్యాయునిగా పనిచేస్తున్నారు. చేతి గడియారాలపై ప్రేమతో.. కొన్నేళ్లుగా పలు షోరూమ్​లు, దుకాణాలు, ఆన్​లైన్​ షాపింగ్​ సైట్లను సంప్రదించారట. అలా ఇప్పటివరకు ఒకే బ్రాండ్​(హెచ్​ఎంటీ)కు చెందిన 400 రకాల వాచ్​లను సేకరించానంటున్నారు మహదేవ స్వామి.

"నేను ఎస్​ఎస్​ఎల్​సీ(పదో తరగతి) పరీక్షల్లో ఉత్తీర్ణత సాధిస్తే.. మా నాన్న నాకు హెచ్ఎంటీ వాచ్​ ఇస్తానని చెప్పారు. దురదృష్టవశాత్తూ నేను పాస్​ కాలేదు. దాంతో వాచ్​ దూరమైంది. సరిగ్గా ఏడాదిన్నర తర్వాత నేనే సొంతంగా ఒక హెచ్​ఎంటీ గడియారాన్ని కొన్నాను. అలా.. క్రమంగా ఈ బ్రాండ్​పై ఆసక్తి పెరిగింది. అదే అభిరుచితో ఇప్పటివరకు సుమారు 400కుపైగా హెచ్​ఎంటీ వాచ్​లను సేకరించారు."

- మహదేవ స్వామి

మహదేవ స్వామి పోగు చేసిన వాచ్​లలో.. హెచ్​ఎంటీ బ్రాండ్​తో పాటు ఇతర కంపెనీల వాచ్​లూ చాలానే ఉన్నాయట. పురుషులకు సంబంధించి జనతా, కొహినూర్​, కాంచన్​, చాణక్య వంటివి చాలా ఉన్నాయి. మహిళకు చెందిన కావేరీ, గోదావరి, గంగా, తారా వంటివెన్నో కనిపిస్తున్నాయి.

తాను సేకరించిన వాచ్​లతో మహదేవ స్వామి

లాక్​డౌన్​లో రిపేరింగ్​ నేర్చుకొని..

తాను పోగు చేసిన గడియారాల్లో కొన్ని సరైన సమయం చూపించక పోవడం, రిపేర్​కు రావడం వంటివి గమనించాడు మహదేవ స్వామి. దీన్ని అధిగమించేందుకు కలిసొచ్చిన లాక్​డౌన్​ కాలాన్ని ఉపయోగించుకుని యూట్యూబ్​ వీడియోలను చూసి రిపేరింగ్​ చేయడం కూడా నేర్చుకున్నారు. అలా వాచ్​ మెకానిక్​గానూ పేరుపొందారాయన.

గడియారాల్ని రిపేరీ చేస్తున్న మహదేవ స్వామి

గడియారాల సేకరణలో వార్తల్లో నిలిచిన మహదేవస్వామిని.. గతేడాది కేంద్ర సాహిత్య అకాడమీ అవార్డు వరించడం విశేషం.

ఇదీ చదవండి:'హైఫై మాస్క్‌ వ్యాక్సిన్‌లా పనిచేస్తుంది'