'2024లో మోదీ ఓటమి కోసం చైనా కుట్ర'

ప్రధాని నరేంద్ర మోదీని వచ్చే సార్వత్రిక ఎన్నికల్లో ఓడించడానికి చైనా కుట్ర పన్నుతోందని భాజపా జాతీయ ప్రధాన కార్యదర్శి కైలాశ్​ విజయవర్గీయ ఆరోపించారు. దేశంలో కరోనా రెండో దశ ఉద్ధృతి సైతం చైనా సృష్టించిన పన్నాగమేనని చెప్పుకొచ్చారు.

2024లో జరిగే ఎన్నికల్లో ప్రధాని నరేంద్ర మోదీని ఓడించడానికి చైనా కుట్ర పన్నుతోందని భాజపా జాతీయ ప్రధాన కార్యదర్శి కైలాశ్​ విజయవర్గీయ ఆరోపించారు. దేశంలో రెండో దశ కరోనా సైతం చైనా సృష్టించిన పన్నాగమేనని చెప్పారు. చైనా మ్యాన్​ మేడ్​ వైరస్​ వల్లే దేశంలో కరోనా తీవ్రత ఎక్కువగా ఉందని అన్నారు. అందువల్లే ఆసియాలోని దేశాలన్నింటిలో భారత్​ మాత్రమే ఇబ్బంది పడుతోందని, మరెక్కడా ఇంత తీవ్రత లేదని చెప్పుకొచ్చారు.

అందుకే మోదీపై కుట్ర..

మోదీ దౌత్య నీతి వల్ల చైనా నిస్సహాయంగా మారిపోయిందని విజయవర్గీయ అన్నారు. అనేక ఇస్లామిక్​ దేశాలు మోదీ వెంట ఉండడం వల్ల చైనా కోపం పెంచుకుందని చెప్పారు. గతంలో జరిగిన అమెరికా ఎన్నికల్లోనూ ట్రంప్​నకు చైనా సహకరించిందనే వార్తా కథనాలను గుర్తు చేశారు.

రైతు ఉద్యమంలోనూ..

అన్నదాతలు కొనసాగిస్తున్న ఉద్యమంలో రైతులు లేరని వర్గీయ అన్నారు. వారి వెనుక విదేశీ శక్తులు ఉన్నాయని ఆరోపించారు. ఇప్పటికే రైతులతో కేంద్రం 12 సార్లు చర్చలు జరిపిందని, ఇకపైనా చర్చించేందుకు సిద్ధంగా ఉందని స్పష్టం చేశారు.

ఇదీ చదవండి:బంగాల్​ పర్యటనకు ప్రధాని మోదీ