Corruption charges: సత్యం ఎప్పటికీ ఓడిపోదు అన్న మహాత్మా గాంధీ మాటకు నిదర్శనం ఈ సంఘటన. అవినీతి ఆరోపణలు ఎదుర్కొంటున్న ఓ వ్యక్తికి 35 ఏళ్ల తర్వాత విముక్తి లభించింది. ఆయనపై నమోదైన కేసును కొట్టివేస్తూ నిర్దోషిగా తీర్పు చెప్పింది బాంబే హైకోర్టులోని నాగ్పుర్ బెంచ్. తనపై వచ్చిన ఆరోపణల నుంచి బయటపడేందుకు తన సగం జీవితం కోర్టుల చుట్టూ తిరిగారు మహారాష్ట్రలోని నాగ్పుర్కు చెందిన 76 ఏళ్ల రామ్ ధీరజ్ రాయ్.
ఏం జరిగింది?
రామ్ ధీరజ్ రాయ్.. 1987లో 35 వెస్టర్న్ కోల్ లిమిటెడ్ చీఫ్ మేనేజింగ్ డైరెక్టర్గా విధులు నిర్వర్తించారు. మహారాష్ట్రలోని కమతి ప్రాంతంలో 25 పడకల ఆసుపత్రి కట్టేందుకు వెస్టర్న్ కోల్ లిమిటెడ్ టెండర్లు ఆహ్వానించింది. ఆ కాంట్రాక్టు ఓ ప్రైవేటుకు సంస్థకు అప్పగించింది. తర్వాత ఆ కాంట్రాక్టును రద్దు చేసి.. ఇండస్ ఇంజినీరింగ్ సంస్థకు ఇచ్చారు.
ఈ వ్యవహారంలో అవినీతి జరిగినట్లు ఆరోపణలు రాగా.. సంస్థలో అప్పటి చీఫ్ ఫైనాన్సింగ్, అకౌంట్స్ అధికారి డి. జనార్ధన్ రావు పోలీసులకు వాంగ్మూలం ఇచ్చారు. ఇండస్ ఇంజినీరింగ్ సంస్థకు కాంట్రాక్ట్ ఇవ్వాలని తనపై రామ్ ధీరజ్ రాయ్ ఒత్తిడి తెచ్చారని ఆరోపించారు. దీంతో రాయ్తో పాటు ఇండస్ సంస్థ యజమానిపై అవినీతి నిరోధక చట్టం కింద కేసు నమోదైంది.
తనపై వచ్చిన ఆరోపణలను ఖండిస్తూ.. బాంబే హైకోర్టును ఆశ్రయించారు ధీరజ్ రాయ్. సంవత్సరాల పాటు పోరాటం సాగించారు. తమ సంస్థ ఫైనాన్సింగ్ అధికారిపై ఒత్తడి తెచ్చేందుకు తనకు ఎలాంటి అధికారాలు లేవని, జనార్ధన్ రావుకే కాంట్రాక్టుల కేటాయింపులపై పూర్తి అధికారం ఉంటుందని కోర్టుకు తెలిపారు. తనపై వచ్చిన ఆరోపణలు నిరాధారమైనవి వెల్లడించారు. ఇరు వర్గాల వాదనలు, సాక్ష్యాధారాలు పరిశీలించిన ధర్మాసనం.. ఆయనను నిర్దోషిగా తేల్చింది.
ఇదీ చూడండి:
చేయని నేరానికి జైలులోనే 43 ఏళ్లు.. చివరకు..
