కాంగ్రెస్ మాజీ అధ్యక్షుడు రాహుల్ గాంధీకి ఝార్ఖండ్ దిగువ కోర్టులు సమన్లు జారీచేశాయి. పరువునష్టం కేసులో రెండేళ్లు జైలుశిక్ష పడి.. లోక్సభలో అనర్హత వేటు పడిన రాహుల్ను.. మరో 3 కేసుల్లో విచారణకు రావాలని కోరుతూ దిగువ కోర్టులు సమన్లు జారీ చేశాయి. వీటిలో ప్రదీప్ మోదీకి సంబంధించి ఒక కేసు కాగా.. కేంద్ర మంత్రి అమిత్ షాపై చేసిన వ్యాఖ్యలకు గాను మిగిలిన రెండు కేసులు నమోదయ్యాయి. దీంతో ఏప్రిల్ 1, 3, 5 తేదీల్లో విచారణకు రావాలంటూ రాహుల్కు కోర్టులు సమన్లు జారీ చేశాయి.
2021లో ప్రదీప్ మోదీ.. దాఖలు చేసిన కేసుకు సంబంధించి ఏప్రిల్ 1న విచారణకు హాజరుకావాలని రాంచీలోని దిగువ కోర్టు రాహుల్ గాంధీకి సమన్లు జారీ చేసింది. ప్రదీప్ మోదీ నమోదు చేసిన పిటిషన్ను గతంలో రాష్ట్ర కాంగ్రెస్ అధ్యక్షుడు రాజేశ్ ఠాకూర్ హైకోర్టులో సవాలు చేశారు. అయితే రాజేశ్ ఠాకూర్ చేసిన అభ్యర్థనను జనవరి 17న హైకోర్టు తిరస్కరించింది. దీంతో లోయర్ కోర్టు ఏప్రిల్ 1న ఈ కేసుకు సంబంధించి విచారణకు హాజరుకావాలని రాహుల్ గాంధీకి సమన్లు జారీ చేసింది. 2019లో ఝార్ఖండ్ ఎన్నికల ప్రచారంలో భాగంగా రాహుల్ గాంధీ 'మోదీలందరూ దొంగలని' అన్నారు. ప్రదీప్ మోదీ కాంగ్రెస్ పార్టీకి భూమిని విరాళంగా ఇచ్చిన కుటుంబానికి చెందిన వారు. రాహుల్ చేసిన ఆ వ్యాఖ్యలను సవాల్ చేస్తూ ప్రదీప్ మోదీ దిగువ కోర్టులో పిటిషన్ దాఖలు చేశారు. మోదీ వంశంపై చేసిన ఇదే తరహా వ్యాఖ్యలకు గానూ.. సూరత్ కోర్టు రాహుల్ను దోషిగా తేల్చి రెండేళ్ల జైలు శిక్షను విధించింది. దీంతో తన కేసును కూడా త్వరగా విచారించాలని ప్రదీప్ మోదీ కోర్టును కోరారు.
మిగిలిన రెండు కేసులు రాంచీలోని ఎంపీ-ఎమ్మెల్యే కోర్టు, చైబాసా కోర్టులో నమోదైయ్యాయి. నవీన్ ఝా, ప్రదీప్ కుమార్ అనే పిటిషనర్లు ఈ రెండు కోర్టుల్లో పిటిషన్లు దాఖలు చేశారు. 2018లో కాంగ్రెస్ సమావేశంలో మాట్లాడిన రాహుల్ గాంధీ.. అమిత్ షా 'హంతకుడు' అని అన్నారు. దీంతో నవీన్ ఝా, ప్రదీప్ కుమార్లు కోర్టులో పిటిషన్లు దాఖలు చేశారు. అయితే నవీన్ ఝా పిటిషన్ను ఏప్రిల్ 5న, ప్రదీప్ కుమార్ పిటిషన్ను ఏప్రిల్ 3న విచారించనున్నాయి.
2019 లోక్సభ ఎన్నికల ప్రచారం సందర్భంగా కర్ణాటకలోని కోలార్‌లో రాహుల్ 'దొంగలందరికీ మోదీ అనే ఇంటిపేరే ఎందుకు ఉంటుందో?' అని వ్యాఖ్యానించారంటూ గుజరాత్ భాజపా ఎమ్మెల్యే పూర్ణేశ్‌ మోదీ గుజరాత్లోని సూరత్ న్యాయస్థానంలో పరువునష్టం దావా వేశారు. దీంతో ఈ కేసును విచారించిన సూరత్ కోర్టు రాహుల్ గాంధీని దోషిగా తేల్చుతూ రెండేళ్ల జైలు శిక్షను విధించింది. కోర్టు ఇచ్చిన ఈ తీర్పును ఆధారంగా చేసుకుని లోక్సభ రాహుల్పై అనర్హత వేటు వేసింది. అయితే, ఏదైనా కేసులో నిందితులు దోషులుగా తేలిన తర్వాత జైలు శిక్ష పడినవారికి ప్రజాప్రతినిధిగా కొనసాగే అవకాశం ఉండదంటూ ప్రజాప్రాతినిధ్య చట్టంలో చేసిన మార్పులకు అనుగుణంగా లోక్సభ సచివాలయం ఈ నిర్ణయం తీసుకుంది. దీంతో రాహాల్కు రెండేళ్ల జైలు శిక్షాకాలంతో పాటుగా మరో ఆరేళ్లు ఎన్నికల్లో పోటీ చేసేందుకు అనర్హులు అవుతారు. దీంతో లోక్సభ సభ్వత్వాన్ని కోల్పోయిన రాహుల్కు సంఘీభావంగా దేశవ్యాప్తంగా కాంగ్రెస్ శ్రేణులు పెద్ద ఎత్తున సత్యాగ్రహం చేపట్టాయి. ప్రధాని మోదీకి వ్యతిరేకంగా మాట్లాడి రాహుల్ గాంధీ గొంతును అణిచివేసేందుకే అనర్హత వేటు వేశారని కాంగ్రెస్ శ్రేణులు ఆరోపించాయి.
