ప్రశాంతంగా కశ్మీర్ ఎన్నికల పోలింగ్
కశ్మీర్లో స్థానిక సంస్థల ఐదో విడత పోలింగ్ ప్రశాంతంగా సాగుతోంది. జమ్ముకశ్మీర్లోని 37 డిస్ట్రిక్ట్ డెవలప్మెంట్ కౌన్సిల్ (డీడీసీ) నియోజకవర్గాలకు మొత్తం 2,104 పోలింగ్ కేంద్రాల్లో ఓటింగ్ జరుగుతోంది. వాటితో పాటు 58 సర్పంచ్, 218 వార్డు స్థానాలకు పోలింగ్ నిర్వహిస్తున్నారు.
ఉదయం 7 గంటలకు ఓటింగ్ ప్రారంభమైన క్రమంలో చలిని సైతం లెక్కచేయక పోలింగ్ కేంద్రాలకు తరలివస్తున్నారు ఓటర్లు. ఉదంపుర్ జిల్లాలోని ఖూన్ గ్రామం, అనంత్నాగ్, గందెర్బాల్, మండాల్, బాకి అకెర్, కుప్వారా ప్రాంతాల్లో పోలింగ్ కేంద్రాల ముందు బారులు తీరారు. భారీ క్యూలైన్లు కనిపించాయి. మధ్యాహ్నం 2 గంటల వరకు పోలింగ్ జరగనుంది.
ఐదో దశలో ఓటింగ్ జరుగుతోన్న 37 డీడీసీల్లో 17 కశ్మీర్ డివిజన్, 20 జమ్ము డివిజన్లో ఉన్నట్లు రాష్ట్ర ఎన్నికల కమిషనర్ కేకే శర్మ తెలిపారు. కశ్మీర్ డివిజన్లో మొత్తం 155 మంది (30 మంది మహిళలు), జమ్ములో 144 మంది (40 మంది మహిళలు) పోటీలో ఉన్నట్లు తెలిపారు.
మొత్తం 8,27,519 ఓటర్లు అభ్యర్థుల భవితవ్యాన్ని తేల్చనున్నారు. అందులో 433,285 పురుషులు, 394,234 మంది మహిళా ఓటర్లు ఉన్నారు.