పొటాటో అంటే ఉల్లిగడ్డలు ! సోషల్​ మీడియాలో సీఎం వ్యాఖ్యలు వైరల్​

Jagan Onion and Potato Comments in Tirupati Sabha: సీఎం స్పీచ్​లు వింటే ఆయన తెలుగు ఏ స్థాయిలో ఉంటుందో అంటూ ప్రతిపక్షాలు వ్యంగ్యస్త్రాలు విసురుతున్నాయి. సాధారణంగా ఇంట్లో వినియోగించుకునే కూరగాయల పేర్లు కూడా ముఖ్యమంత్రికి తెలుగులో తెలియడం లేదంటూ సామాజిక మాధ్యమాల్లో ట్రోల్ చేస్తున్నారు. దీంతో వైసీపీ, టీడీపీ మధ్య ఓ యుద్దమే జరుగుతోంది. తిరుపతి జిల్లా వరద బాధిత ప్రాంతాల్లో పర్యటించిన సీఎం జగన్ వరద సహాయ చర్యలపై వివరించే క్రమంలో కొంత తడబడ్డారు. బంగాళాదుంపలను ఉల్లిగడ్డలు అన్నారు. ఈ మాటలు సోషల్‌ మీడియాలో వైరల్‌ అవుతున్నాయి.

Jagan Onion and Potato Comments in Tirupati Sabha:సీఎం జగన్ స్పీచ్ అంటే చాలు చాలా మంది జుట్టు పీక్కుంటారు. ఏం మాట్లాడతారా అందులో ఏం అర్ధం వస్తుందా అని. ఇక బహిరంగ సభల్లో అయితే జగన్ ప్రజలను చూసి మాట్లాడే దాని కంటే పేపర్​ను చూసి మాట్లాడటమే ఎక్కువ ఉంటుంది. అందులోనూ అక్కడ ఉన్న పదాలు చదవకుండా కొత్త పదాలు వాడుతుంటారనే ప్రచారం జరుగుతోంది. మీటింగ్స్​లో జగన్​ స్పీచ్​ అంటే అందరి కంటే ముందు కంగారుపడేది వైసీపీ శ్రేణులు, కార్యకర్తలే. ఏ పదాన్ని ఏం అంటారోనని, ఏ పదాన్ని ఎలా పలుకుతారోనని టెన్షన్​ పడుతుంటారు. జగన్ మాట్లాడే దానికి సామాజిక మాధ్యమాల్లో జనాలు ఏ రేంజ్​లో ట్రోల్స్​ చేస్తారా అని భయపడుతూ ఉంటారు. గతంలోనూ ఎన్నో సభల్లోనూ, ప్రెస్​మీట్​ల్లోనూ జగన్ మాట్లాడే స్పీచ్​లో అనేక సార్లు తప్పులు దొర్లి ఈ విధంగా జరిగాయి. తాజాగా మరోసారి అదేవిధంగా సీఎం వ్యాఖ్యలు సోషల్​ మీడియాలో ట్రోల్​ అవుతున్నాయి.

ఇటీవల సంభవించిన మిగ్​జాం తుపాను రాష్ట్రాన్ని అతలాకుతలం చేసిన సంగతి తెలిసిందే. ఈ తుపాన్ వల్ల రైతులు భారీగా నష్టపోయారు. చేతికి వచ్చిన పంట సర్వనాశనం అయిందని గగ్గోలు పెడుతూ ప్రభుత్వమే తమను ఆదుకోవాలని ఆవేదన వ్యక్తం చేశారు. ఈ నేపథ్యంలో సీఎం జగన్ తిరుపతి జిల్లాలో పర్యటించారు. ఇక్కడ ఏర్పాటు చేసిన సభలో జగన్ మాట్లాడుతూ బాధితులకు అందిస్తున్న కూరగాయల గురించి మాట్లాడుతూ కేజీ ఆనియన్, కేజి ఉల్లిగడ్డ అని జగన్ పలికారు. పక్కన ఉన్నవారు కాదు అని చెప్పగా 'పొటాటోని ఉల్లిగడ్డే' అంటారుగా అంటూ అధికారులను ప్రశ్నించారు. సీఎంకు పోటాటోని తెలుగులో ఏమంటారో తెలియకపోవడంతో అక్కడికి వచ్చిన జనం బంగాళదుంప అంటారని నవ్వుతూ సమాధానం ఇచ్చారు. చివరిగా పక్కనే ఉన్న అధికారులను పొటాటోను ఏమంటారో అడిగి బంగాళ దుంప అని స్పీచ్​లో చెప్పారు. దీంతో ఆలుగడ్డకు, ఉల్లిగడ్డకు తేడా తెలియని సీఎం రాష్ట్రానికి పట్టిన దరిద్రం అంటూ సోషల్ మీడియాలో ట్రోల్స్ ప్రారంభమయ్యాయి.

Jagan Funny Comments in Past:ఇది మాత్రమే కాదు గతంలో కూడా 'మిలాఖాతుల్లో ములాఖాతులై' అంటూ ఓ సారి 'కాస్తో ఇస్కిస్తో అంటూ మరో సారి నవ్వులపాలయ్యారు. ప్రస్తుతం జగన్ చేసిన ఈ వ్యాఖ్యలు సామాజిక మాధ్యమాల్లో వైరల్ అవుతూ మీమ్స్ రూపంలో హల్​చల్​ అవుతున్నాయి. ఉల్లిగడ్డకు, ఆలుగడ్డకు తేడా లేదా అని ప్రశ్నిస్తున్నారు. జగన్​కు పాలన చేతకాదు, మాట్లాడటం అంతకన్నా రాదని మరికొందరు వ్యంగ్యంగా స్పందిస్తున్నారు. మాకు ఏంటి ఈ కర్మ అని నెటిజన్లు ఆగ్రహం వ్యక్తం చేస్తున్నారు.

TDP Response on Jagan Potato Comments:సీఎం జగన్​కు సీమలో పలికే ఉల్లగడ్డ అంటే తెలియదని, ఆంధ్రాలో పలికే బంగాళదుంప అంటే కూడా తెలియదని టీడీపీ నేతలు విమర్శిస్తున్నారు. జగన్​కు అసలు ఏ యాసా తెలియదని, అందుకే కాస్తో ఇస్కిస్తో లాంటి కొత్త పదాలు కనిపెట్టాడంటూ టీడీపీ నేతలు ఎద్దేవా చేస్తున్నారు. గడ్డ ఏదో, దుంప ఏదో తెలియకే కదా, ప్రజల నోట్లో మట్టి గడ్డలు కొడ్తున్నాడని టీడీపీ నేతలు విమర్శించారు. దమ్ము అనే పదం గురించి, పరదాలు కప్పుకుని తిరిగే మీరే చెప్పాలంటూ వ్యంగ్యాస్త్రాలు గుప్పించారు.

YCP on TDP Response to Jagan Potato Comments:తెలుగుదేశం ట్రోల్స్​పై వైసీపీ స్పందించింది. బంగాళాదుంపని రాయలసీమలో ఉల్లగడ్డ అని పిలుస్తారని వివరించింది. అలానే ఉల్లిపాయని ఎర్రగడ్డ అని పిలుస్తుంటారని తెలిపింది. సీమలో పుట్టి పెరిగిన ప్రతి ఒక్కరికీ ఈ విషయం తెలుసని తెలిపింది. మేం రాయలసీమ వాసులం అని చెప్పుకునే టీడీపీకి ఆ విషయం తెలియకపోవడం మీకు సీమ యాస, భాష పట్ల ఏమాత్రం జ్ఞానం ఉందో అర్ధమవుతుందని పేర్కొంది. అది రాయలసీమ యాస, భాష దాన్ని మీరు గుర్తించలేదు కాబట్టే 2019 ఎన్నికల్లో మీకు 3 సీట్లు వచ్చాయని దురుసుగా సమాధానమిచ్చింది.