మధ్యప్రదేశ్లోని జబల్పుర్లో హృదయ విదారక ఘటన వెలుగులోకి వచ్చింది. ఓ చేత్తో కుమారుడిని ఎత్తుకుని మరో చేత్తో రిక్షా తొక్కుతూ జీవనం సాగిస్తున్నాడు ఓ యువకుడు. అలా రిక్షా తొక్కడం ప్రమాదకరమైనా అతడికి తప్పట్లేదు. అసలేం జరిగిందంటే..
బిహార్ నివాసి అయిన రాజేశ్ మల్దార్.. పొట్టకూటి కోసం జబల్పుర్కు పదేళ్ల క్రితం వచ్చాడు. స్థానికంగా కూలీ పని చేసుకుంటూ జీవనం కొనసాగిస్తున్నాడు. ఆ సమయంలో కన్హర్వాడ గ్రామానికి చెందిన ఓ అమ్మాయితో ప్రేమలో పడ్డాడు. ఆ తర్వాత ఇద్దరూ పెళ్లి చేసుకున్నారు. వారి వివాహ బంధానికి గుర్తుగా ఇద్దరు పిల్లలు పుట్టారు. కుటుంబంతో రోడ్డు పక్కన పుట్పాత్పైనే నివసిస్తున్నాడు రాజేశ్. అయితే కొన్నిరోజులు క్రితం.. అతడి భార్య పిల్లలిద్దరినీ విడిచిపెట్టి స్థానికంగా ఉంటున్న ఓ ట్రక్కు డ్రైవర్తో వెళ్లిపోయింది.
ఆ తర్వాత భార్య ఆచూకీ కోసం తీవ్రంగా ప్రయత్నించినా లాభం లేకుండా పోయింది. ఇక పిల్లలిద్దరి బాధ్యత రాజేశ్పైనే పడింది. కుటుంబపోషణ చాలా కష్టంగా మారింది. ఇక చేసేదేమీ లేక రాజేశ్.. ఓ చేత్తో కుమారుడ్ని ఎత్తుకొని మరో చేత్తో రిక్షా నడుపుతున్నాడు. అలా పిల్లాడ్ని ఎత్తుకునే రోజంతా రిక్షా తొక్కుతున్నాడు. పెద్ద బిడ్డను ఫుట్పాత్పైనే యువకుడి తల్లి చూసుకుంటోంది. పేదరికంలో మగ్గుతున్న తనకు ఎటువంటి ప్రభుత్వ పథకాలను అందడం లేదని వాపోతున్నాడు. రాజేశ్ దుస్థితి చూసి అందరూ చాలా చలించిపోతున్నారు.