Isro Chandrayaan 3 Lander Module :చంద్రయాన్-3 మిషన్‌లో భాగంగా ల్యాండర్ పొజిషన్‌ డిటెక్షన్‌ కెమెరా.. LPDC తీసిన జాబిల్లి చిత్రాలను ఇస్రో విడుదల చేసింది. ఆగస్టు 15, 17వ తేదీల్లో ఈ చంద్రుని చిత్రాలను LPDC తీసింది. గురువారం ప్రొపల్షన్‌ మాడ్యూల్‌ నుంచి ల్యాండర్ మాడ్యూల్‌ విడిపోయిన తర్వాత తీసిన చంద్రుని చిత్రాలను ఇస్రో..సామాజిక మాధ్యమం ఎక్స్‌లో పోస్ట్‌ చేసింది. ల్యాండర్ మాడ్యూల్‌లో ఉన్న కెమెరాతో తీసిన ఈ చిత్రాల్లో ప్రొపల్షన్‌ మాడ్యూల్‌తో పాటు చంద్రునిపై వివిధ ప్రదేశాలను చూడవచ్చు.
మరోవైపు చంద్రయాన్-3 మిషన్‌లో మరో కీలక ఘట్టాన్ని ఇస్రో శుక్రవారం పూర్తి చేసింది. గురువారం ప్రొపల్షన్‌ మాడ్యూల్‌ నుంచి విడిపోయిన ల్యాండర్ మాడ్యూల్‌ డీబూస్టింగ్‌ ప్రక్రియను విజయవంతంగా పూర్తి చేసింది. ప్రస్తుతం ల్యాండర్ మాడ్యూల్‌ 113 కిలోమీటర్లు X 157 కిలోమీటర్ల కక్ష్యలో చంద్రుని చుట్టూ తిరుగుతోంది. ఆగస్టు 20వ తేదీన మరోసారి డీబూస్టింగ్‌ ప్రక్రియ చేపట్టి మరోసారి కక్ష్యను తగ్గించనున్నారు. చివరగా ల్యాండర్ వేగం తగ్గించి చంద్రునికి దగ్గరగా 30 కిలోమీటర్లు, దూరంగా 100 కిలోమీటర్ల కక్ష్యలో ప్రవేశపెట్టనున్నారు. అక్కడ నుంచి ల్యాండర్ మాడ్యూల్‌ను.. జాబిల్లి దక్షిణ ధ్రువంపై దిగే ప్రక్రియ చేపట్టనున్నారు. చంద్రునిపై ల్యాండర్ దిగేటప్పుడు ఆరంభంలో వేగం సెకనుకు 1.68 కిలోమీటర్లు ఉండనుంది. వేగం తగ్గించుకుంటూ.. ఈనెల 23 సాయంత్రం 5 గంటల 47 నిమిషాలకు ల్యాండర్ జాబిల్లి దక్షిణ ధ్రువంపై అడుగుపెట్టనుంది. అనంతరం ల్యాండర్ నుంచి రోవర్‌ బయటకు వచ్చి 14 రోజుల పాటు పరిశోధనలు చేయనుంది.
చంద్రయాన్-2 విషయంలో సాఫ్ట్‌ ల్యాండింగ్‌లో ఇస్రో విఫలమైంది. ఈసారి సెన్సార్లు, ఇంజిన్లు విఫలమైనా జాబిల్లిపై ల్యాండర్ మృదువుగా దిగేలా జాగ్రత్తలు తీసుకుంది. ప్రొపల్షన్‌ మాడ్యూల్‌ మాత్రం ప్రస్తుత కక్ష్యలోనే కొన్నేళ్లపాటు తన ప్రయాణం కొనసాగించనుంది. అక్కడి నుంచి భూమి వాతావరణం, మేఘాల కదలికలపై అధ్యయనం చేయనుంది.