భారత వాయుసేనకు చెందిన శిక్షణ యుద్ధవిమానం మిగ్-21 రాజస్థాన్‌లోని బాడ్మేర్ జిల్లాలో కుప్పకూలింది. ఈ ఘటనలో ఇద్దరు పైలట్లు మృతిచెందారు. బిమ్రా సమీపంలో గురువారం రాత్రి 9.10 గంటల సమయంలో ఈ ఘటన జరిగినట్లు ఇండియన్‌ ఎయిర్‌ ఫోర్స్‌ ధ్రువీకరించింది. విమానం కూలిన సమయంలో పెద్దఎత్తున మంటలు వ్యాపించాయి. దీనికి సంబంధించిన చిత్రాలు సామాజిక మాధ్యమాల్లో చక్కర్లు కొడుతున్నాయి. ఈ ప్రమాదంపై భారత వాయుసేన అధిపతి మార్షల్‌ వీఆర్‌ చౌదరితో కేంద్ర రక్షణశాఖ మంత్రి రాజ్‌నాథ్‌సింగ్‌ మాట్లాడి వివరాలు తెలుసుకున్నారు. పైలట్ల మృతి పట్ల రాజ్‌నాథ్‌ సింగ్‌ తీవ్ర విచారం వ్యక్తం చేశారు. వారి సేవను దేశం ఎప్పుడూ మరిచిపోదన్నారు. ఈ మేరకు ఆయన ట్వీట్‌ చేశారు.
మిగ్-21 ప్రమాదం జరిగి పైలట్లు మృతిచెందడంపై భారత వాయుసేన తీవ్ర విచారం వ్యక్తం చేసింది. ప్రమాదానికి గల కారణాలు తెలుసుకోవడానికి కోర్ట్‌ ఆఫ్‌ ఎంక్వైరీని ఆదేశించినట్లు తెలిపింది.