US Visa India : భారతీయులకు అగ్రరాజ్యం అమెరికా తీపికబురు అందించింది. ఏడాదికి దాదాపు 12 లక్షల వీసాలు మంజూరు చేసేందుకు ప్రణాళికలు సిద్ధం చేస్తున్నట్లు.. భారత్లోని అమెరికా దౌత్య కార్యాలయం వెల్లడించింది. ప్రస్తుతం మెక్సికో, చైనాకు.. అమెరికా అత్యధికంగా వీసాలను జారీ చేస్తోంది. ఈ జాబితాలో మూడో స్థానంలో ఉన్న భారత్ అధిక వీసాల జారీ తర్వాత రెండో స్థానానికి వచ్చే అవకాశముందని అమెరికా భావిస్తోంది.
కరోనా నేపథ్యంలో వివిధ దేశాల వారికి వీసాల మంజూరు ప్రక్రియను.. అమెరికా కఠినతరం చేసింది. భారత్ నుంచి వీసా కోసం దరఖాస్తు చేసుకున్న వారి సంఖ్య భారీగా పెరిగిపోయింది. వీసా జారీకి దాదాపు ఏడాదికిపైగా సమయం పట్టింది. అయితే ఇటీవల అమెరికా ప్రభుత్వం చేపట్టిన చర్యల వల్ల.. ఈ జాప్యం 9 నెలలకు తగ్గింది. అంతకుముందు 450 రోజులుగా ఈ గడువు ఉండేది. రానున్న రోజుల్లో దీనిని మరింత తగ్గించేందుకు చర్యలు చేపడుతున్నామని అమెరికా దౌత్యాధికారి తెలిపారు.