కశ్మీర్​పై పాక్​-చైనా ప్రకటన- ఖండించిన భారత్​

కశ్మీర్​, లద్దాఖ్​లు తమ అంతర్గత ప్రాంతాలని మరోమారు స్పష్టం చేసింది భారత్​. జమ్ముకశ్మీర్​ను సూచిస్తూ పాకిస్థాన్​-చైనాలు ఇటీవల సంయుక్త ప్రకటన చేయటాన్ని తప్పుపట్టింది. సీపెక్​ సైతం తమ భూభాగంలోనే ఉందని, దానిని పాక్​ అక్రమంగా ఆక్రమించుకుందని తెలిపింది. పాక్​ ఆక్రమిత భూభాగాల స్థితని మార్చాలని ప్రయత్నిస్తే ఊరుకునేది లేదని స్పష్టం చేసింది.

జమ్ముకశ్మీర్​పై ఇటీవల పాకిస్థాన్​, చైనాలు సంయుక్త ప్రకటన చేయటాన్ని తీవ్రంగా ఖండించింది భారత్​. కేంద్ర పాలిత ప్రాంతాలైన జమ్ముకశ్మీర్​, లద్దాఖ్​లు తమ అంతర్గత భాగమని స్పష్టం చేసింది. అలాగే.. చైనా-పాకిస్థాన్​కు చెందినట్లు చెప్పుకొంటోన్న ఆర్థిక కారిడార్​పైనా ప్రకటన చేయటాన్ని తప్పుపట్టారు భారత విదేశాంగ శాఖ ప్రతినిధి అరిందమ్​ బాగ్చీ. అది భారత భూభాగంలో ఉందని, దానిని పాకిస్థాన్​ అక్రమంగా ఆక్రమించుకుందని పేర్కొన్నారు.

" జమ్ముకశ్మీర్​ గురించి మాట్లాడే ప్రతి అంశాన్ని భారత్​ ఇప్పటికే తిరస్కరించింది. కేంద్ర పాలిత ప్రాంతాలైన జమ్ముకశ్మీర్​, లద్దాఖ్​లు భారత అంతర్భాగం, మా దేశంతో విడదీయలేని భూభాగాలు. సీపెక్​ భారత భూభాగంలో ఉందని పాకిస్థాన్​, చైనాలకు ఇప్పటికే తెలియజేశాం. పాకిస్థాన్​ అక్రమంగా ఆక్రమించుకున్న భూభాగాల స్థితిని మార్చేందుకు ఏ దేశమైనా ప్రయత్నిస్తే భారత్​ దానిని సహించదు. అలాగే.. పాకిస్థాన్​ సైతం తమ అధీనంలో ఉందనే కారణంగా మార్చాలనుకున్నా ఊరుకునేది లేదు. అలాంటి చర్యలను అడ్డుకోవాలని సంబంధిత అంతర్జాతీయ విభాగాలను కోరాం."

- అరిందమ్​ బాగ్చీ, విదేశాంగ శాఖ ప్రతినిధి.

చైనాలోని సిచౌన్​ రాష్ట్రం చెంగ్డు ప్రాంతంలో ఇరు దేశాల విదేశాంగ మంత్రులు షా మహమ్మద్​ ఖురేషీ, వాంగ్​ యీలు గత శనివారం సమావేశమయ్యారు. ఈ సందర్భంగా కశ్మీర్​ అంశాన్ని పేర్కొంటూ సంయుక్త ప్రకటన చేశారు. జమ్ముకశ్మీర్​లో పరిస్థితులు అత్యంత దారుణంగా ఉన్నాయని చైనాకు పాక్​ తెలిపినట్లు పేర్కొన్నారు. కశ్మీర్​ అంశాన్ని అంతర్జాతీయంగా లేవనెత్తేందుకు అవకాశం దొరికినప్పుడల్లా ప్రయత్నిస్తోంది పాకిస్థాన్​. 2019, ఆగస్టులో జమ్ముకశ్మీర్​ స్వయం ప్రతిపత్తిని రద్దు చేసిన తర్వాత ఆ ప్రయత్నాలను మరింత పెంచింది.

ఇదీ చూడండి:'దేశ నిర్మాణ మహా యజ్ఞంలో ఎన్​ఈపీ కీలకం'