India Name Change In Text Books : 'ఇకపై టెక్స్ట్ బుక్స్​లో 'ఇండియా' బదులు భారత్​!'

India Name Change In Text Books : దేశంలోని అన్ని పాఠ్యపుస్తకాల్లో ఇండియా అనే పదాన్ని భారత్​గా మార్చాలని జాతీయ విద్యా పరిశోధన, శిక్షణ మండలి-NCERT సిఫార్సు చేసింది. వివిధ పోరాటాల్లో హిందూ విజయాలను పాఠ్యపుస్తకాల్లో హైలైట్ చేయాలని కూడా కమిటీ సూచించింది. ఈ ప్రతిపాదనలపై విపక్షాలు అభ్యంతరం తెలిపాయి.

India Name Change In Text Books : దేశంలోని అన్ని పాఠ్యపుస్తకాల్లో ఇండియా అనే పదాన్ని భారత్​గా మార్చాలని జాతీయ విద్యా పరిశోధన, శిక్షణ మండలి-NCERT ప్రత్యేక కమిటీ సిఫార్సు చేసింది. ఈ విషయాన్ని ఎన్‌సీఈఆర్‌టీ కమిటీ ఛైర్మన్​ ఐజాక్ బుధవారం​ వెల్లడించారు. పాఠ్య పుస్తకాల్లో ప్రాచీన చరిత్రకు బదులుగా పురాతన చరిత్రను ప్రవేశపెట్టాలని కూడా ఎన్‌సీఈఆర్‌టీ ప్యానెల్ సిఫార్సు చేసినట్లు ఐజాక్​ తెలిపారు.

జాతీయ స్థాయిలో పాఠ్యపుస్తకాలు, ప్రణాళికలను ఖరారు చేసేందుకు ఇటీవలే ఎన్‌సీఈఆర్‌టీ ఏర్పాటు చేసిన ప్రత్యేక కమిటీ.. ఈ సిఫార్సులు చేసినట్లు ఛైర్మన్​ ఐజాక్​ తెలిపారు. ప్యానెల్ చేసిన ప్రతిపాదనను కమిటీ సభ్యులంతా ఏకగ్రీవంగా ఆమోదించినట్లు చెప్పారు. వివిధ పోరాటాల్లో హిందూ విజయాలను పాఠ్యపుస్తకాల్లో హైలైట్ చేయాలని కూడా కమిటీ సిఫార్సు చేసిందని ఆయన చెప్పారు. అన్ని సబ్జెక్ట్​ల పాఠ్య పుస్తకాల్లో ఇండియన్​ నాలెడ్జ్​ సిస్టమ్​ను ప్రవేశపెట్టాలని కూడా సూచించినట్లు వెల్లడించారు. అయితే ప్యానెల్ సిఫార్సులపై ఇంకా ఎలాంటి నిర్ణయం తీసుకోలేదని ఎన్‌సీఈఆర్‌టీ ఛైర్మన్​ దినేశ్​ సక్లానీ ప్రకటించారు.

ఎన్​సీఈఆర్​టీ క్లారిటీ..
మరోవైపు, ప్యానెల్​ చేసిన సిఫార్సులపై ఎన్​సీఈఆర్​టీ క్లారిటీ ఇచ్చింది. జాతీయ స్థాయిలో పాఠ్యపుస్తకాలు, ప్రణాళికల ఖరారు ప్రక్రియ జరుగుతోందని చెప్పింది. ప్యానెల్​ సిఫార్సులపై ఎలాంటి నిర్ణయం తీసుకోలేదని పరోక్షంగా వెల్లడించింది. ఈ దశలో కొన్ని మీడియాల్లో వచ్చిన కథనాలపై స్పందించడం సరికాదని చెప్పింది.

రాజకీయ దుమారం..
అయితే పాఠ్యపుస్తకాల్లో ఇండియా పదాన్ని భారత్​గా మార్చాలన్న ఎన్​సీఈఆర్​టీ కమిటీ సిఫార్సులతో దేశంలో రాజకీయ దుమారం రేగింది. ఎన్​సీఆర్​టీ కమిటీ సిఫార్సులపై కాంగ్రెస్​ జనరల్​ సెక్రటరీ కేసీ వేణుగోపాల్​ మండిపడ్డారు. "పాఠ్యపుస్తకాలు, సిలబస్.. అలా ప్రతి అంశం​ ద్వారా భారతదేశ చరిత్రను ఎలా వక్రీకరిస్తున్నారో చూడండి. మాకు ఇండియా, భారత్​ రెండూ సమానమే" అని తెలిపారు.

'మోదీకి భయం పట్టుకుంది'
విపక్ష కూటమి 'ఇండియా' ఏర్పాటుతో ప్రధాని నరేంద్ర మోదీకి భయం పట్టుకుందని ఆప్​ నేత ప్రియాంక కక్కర్​ విమర్శించారు. పేర్ల మార్పు బదులు నిరుద్యోగం, ద్రవ్యోల్బణం, అవినీతితో పాటు ప్రజలు ఎదుర్కొంటున్న అనేక సమస్యలపై దృష్టి పెట్టాలని సూచించారు. తమకు ఇండియా, భారత్​ రెండూ ఒకటేనని చెప్పారు. రాజ్యాంగంలో ఆ రెండు పదాలు ఉపయోగించినట్లు తెలిపారు. మరోవైపు, ఎన్​సీఈఆర్​టీ సిఫార్సులను తమిళనాడు బీజేపీ ఉపాధ్యక్షుడు నారాయణన్​ తిరుపతి స్వాగతించారు. ఇండియా అంటే భారత్​ అని రాజ్యాంగంలో ఉన్నట్లు తెలిపారు.