India Middle East Europe Corridor : పశ్చిమాసియా మీదుగా భారత్​- ఐరోపా కారిడార్​.. ప్రపంచ అభివృద్ధికి కీలకమన్న మోదీ

India Middle East Europe Corridor : ప్రతిష్ఠాత్మకమైన భారత్​- పశ్చిమాసియా కారిడార్​ ప్రణాళికలను ప్రధాని నరేంద్రమోదీ.. జీ20 సదస్సులో ఆవిష్కరించారు. రాబోయే కాలంలో ఈ కారిడార్ భారత్- ఐరోపా ఆర్థిక ఏకీకరణకు సమర్థవంతమైన మాధ్యమంగా మారుతుందని ఆయన అన్నారు.

India Middle East Europe Corridor : దిల్లీలో జరుగుతున్న జీ20 సదస్సులో ప్రతిష్ఠాత్మకమైన భారత్​- పశ్చిమాసియా-ఐరోపా కారిడార్​ ప్రణాళికలను ప్రధాని నరేంద్రమోదీ ఆవిష్కరించారు. కనెక్టివిటీని భారత్​ ఎప్పుడూ ప్రాంతీయ సరిహద్దులకు పరిమితం చేయదని ప్రధాని మోదీ తెలిపారు. పరస్పర విశ్వాసాన్ని బలోపేతం చేయడంలో ఈ కారిడార్​ కీలక పాత్ర పోషిస్తుందని మోదీ పేర్కొన్నారు.

భారత్​- పశ్చిమాసియా-ఐరోపా ఎకనామిక్ కారిడార్, గ్లోబల్ ఇన్‌ఫ్రాస్ట్రక్చర్ అండ్ ఇన్వెస్ట్‌మెంట్ ప్రారంభ కార్యక్రమంలో మోదీ పలు వ్యాఖ్యలు చేశారు. రాబోయే కాలంలో ఈ కారిడార్ భారత్- ఐరోపా ఆర్థిక ఏకీకరణకు సమర్థవంతమైన మాధ్యమంగా మారుతుందని ఆయన అన్నారు. ప్రపంచవ్యాప్తంగా కనెక్టివిటీ, అభివృద్ధికి స్థిరమైన దిశను ఇస్తుందన్నారు మోదీ. అన్ని దేశాల సార్వభౌమత్వాన్ని, సమగ్రతను గౌరవించాలని కోరారు.

ఇది ఒక చారిత్రక ఒప్పందం : బైడెన్​
India Middle East Europe Transport Corridor : భారత్​- పశ్చిమాసియా కారిడార్​ కోసం తాము చారిత్రక ఒప్పందాన్ని ఖరారు చేసుకున్నట్లు ప్రకటించడం గర్వంగా ఉందని అమెరికా అధ్యక్షుడు జో బైడెన్ అన్నారు. "ఈ కారిడార్‌లో కీలక భాగంగా.. భారత్​ నుంచి ఐరోపా వరకు.. మధ్యలో UAE, సౌదీ అరేబియా, జోర్డాన్​, ఇజ్రాయిల్​లో నౌకలు, రైళ్లపై పెట్టుబడులు పెడుతున్నాం. ఇది మా వాణిజ్యాన్ని సులభతరం చేస్తుంది. ప్రధాని మోదీ, సౌదీ యువరాజు మహమ్మద్​ బిన్​ సల్మాన్​కు ప్రత్యేకంగా ధన్యవాదాలు చెప్పాలనుకుంటున్నాను" అని బైడెన్​ తెలిపారు.

'భారత్​-ఐరోపా వాణిజ్య సంబంధాలు'
ఐరోపా కమిషన్ ప్రెసిడెంట్ ఉర్సులా వాన్ డెర్ లేయెన్ ఈ కారిడార్​ ఒప్పందాన్ని చారిత్రకమైనదిగా వర్ణించారు. ఈ కారిడార్​ భారత్​, సౌదీ అరేబియా, గల్ఫ్, ఐరోపా మధ్య అత్యంత ప్రత్యక్ష కనెక్టవిటీ అని తెలిపారు. దీని ద్వారా భారత్​- ఐరోపా మధ్య వాణిజ్యం 40 శాతం వేగవంతం అవుతుందని చెప్పారు. కొత్త కారిడార్ ప్రారంభం.. ప్రపంచ ఏకీకరణను బలోపేతం చేయడంలో ఒక మైలురాయి అని ఇటలీ ప్రధాని జార్జియా మెలోని అన్నారు. ఈ కారిడార్ విషయంలో సహకారం అందించడానికి జర్మనీ కట్టుబడి ఉందని ఆ దేశ ఛాన్స్​లర్​ ఒలాఫ్ షోల్జ్ తెలిపారు.

ఒప్పందంపై సంతకం చేసింది వీళ్లే..
India Middle East Europe Economic Corridor : భారత్​- పశ్చిమాసియా కారిడార్ ఏర్పాటుకు సంబంధించిన అవగాహన ఒప్పందంపై భారత్​, అమెరికా, యూఏఈ, సౌదీ అరేబియా, ఇటలీ, జర్మనీ, ఫ్రాన్స్​, ఐరోపా యూనియన్ సంతకాలు చేసినట్లు ప్రభుత్వ అధికారులు తెలిపారు. ఈ కారిడార్..​ పశ్చిమాసియా, ఐరోపా మధ్య మెరుగైన కనెక్టివిటీతోపాటు ఆర్థిక అభివృద్ధికి ప్రోత్సాహాన్ని అందిస్తుందని చెప్పారు.