ఆ లక్ష్యం ఐదేళ్ల ముందుకు: మోదీ

2030 నాటికి పెట్రోల్​లో 20శాతం ఇథనాల్​ కలపాలనే లక్ష్యాన్ని ఐదేళ్లు ముందుకు జరిపినట్లు తెలిపారు ప్రధాని మోదీ. ఇథనాల్ రంగ అభివృద్ధి ద్వారా పర్యావరణ పరిరక్షణ సహా రైతులకు ఆర్థికంగా మేలు చేయనున్నట్లు వెల్లడించారు.

ఆర్థిక వ్యవస్థ, పర్యావరణం కలిసి పయనించగలవని చెప్పారు ప్రధానమంత్రి నరేంద్ర మోదీ. భారత్​ ఎంచుకున్న మార్గం అదేనని తెలిపారు. నేడు ప్రపంచ పర్యావరణ దినోత్సవం సందర్భంగా కేంద్ర పెట్రోలియం, రవాణా శాఖ మంత్రి ధర్మేంద్ర ప్రధాన్, పర్యావరణ శాఖ మంత్రి ప్రకాశ్ జావడేకర్​తో ఆయన వర్చువల్​గా సమావేశమయ్యారు. ఈ సందర్భంగా ఇథనాల్​ రంగ అభివృద్ధికి రోడ్​మ్యాప్​ విడుదల చేయడం ద్వారా భారత్​ కీలక ముందడుగు వేసిందని మోదీ అన్నారు.

కేంద్ర మంత్రులు, అధికారులతో మోదీ

" 2030 నాటికి పెట్రోల్​లో 20శాతం ఇథనాల్​ కలపాలనే లక్ష్యాన్ని ఐదేళ్లు ముందుకు జరిపి.. 2025కే కుదించాం. దీంతో కాలుష్య కట్టడి, దిగుమతులపై ఆధారపడటాన్ని తగ్గించనున్నాం. చెరకు సహా చెడిన ఆహార ధాన్యాల నుంచి తీసే ఇథనాల్​.. పర్యావరణహితమే కాక రైతులకు ప్రత్యామ్నాయ ఆదాయ వనరుగా పనిచేస్తుంది. ఇథనాల్ ఉత్పత్తి, పంపిణీ కోసం ఇ-100 పైలట్​ ప్రాజెక్టు నేడు పుణెలో ప్రారంభమైంది."

- నరేంద్ర మోదీ, ప్రధాన మంత్రి

వాతావరణ సంరక్షణ చర్యల్లో భాగంగా పునరుత్పాదక ఇంధన సామర్థ్యం.. భారత్​లో 250శాతం పెరిగిందని మోదీ తెలిపారు. వాతావరణ మార్పుల పనితీరు సూచీలో భారత్​ టాప్​ 10లో ఉందని వెల్లడించారు.

'ప్ర‌కృతితో మ‌మేక‌మ‌వ్వాలి'

ప్ర‌స్తుత క‌రోనా ప‌రిస్థితుల్లో మ‌నిషి ప్ర‌కృతితో మ‌మేక‌మై జీవించ‌డం అవ‌స‌ర‌మ‌ని ఉప రాష్ట్ర‌ప‌తి వెంక‌య్య‌నాయుడు అన్నారు. ప్ర‌పంచ ప‌ర్యావ‌ర‌ణ దినోత్సవం సంద‌ర్భంగా ఆయ‌న శుభాకాంక్ష‌లు తెలిపారు. ప‌ర్యావ‌ర‌ణాన్ని కాపాడుకోవ‌డం మ‌నంద‌రి బాధ్య‌త అని చెప్పారు. సుస్థిర వ్యవ‌సాయ విధానాల‌ను అమ‌లు చేయాల‌ని రైతుల‌కు సూచించారు. అట‌వీక‌ర‌ణ‌ను ప్రోత్స‌హించి స‌ముద్ర కాలుష్యాన్ని అరిక‌ట్టాల‌న్నారు. క‌ర్భ‌న ఉద్గారాల‌ను త‌గ్గించ‌డంపై అంద‌రూ దృష్టి పెట్టాల‌ని వెంక‌య్య‌నాయుడు పిలునిచ్చారు.

ఇదీ చూడండి:పుడమికి పునరుజ్జీవం జీవజాలానికి అభయం