ఇండో పసిఫిక్​పై భారత్​, ఫ్రాన్స్ చర్చలు

ఇండో-పసిఫిక్​ ప్రాంతంలో సహకారం బలోపేతంపై భారత్, ఫ్రాన్స్​ విదేశాంగ మంత్రులు విస్తృత చర్చలు జరిపారు. నౌకాయానం, అంతరిక్షంలో సవాళ్లను ఎదుర్కొనే అంశంలో ఆస్ట్రేలియాతో కలిసి పనిచేసే అంశాన్ని పరిశీలించారు.

ఇండో పసిఫిక్​లో సహకారం బలోపేతం దిశగా భారత్​, ఫ్రాన్స్​ మంగళవారం చర్చించాయి. నౌకాయానం, అంతరిక్షంలో ఎదురయ్యే సవాళ్లను ఎదుర్కొనేందుకు ఆస్ట్రేలియాతో త్రైపాక్షిక కూటమి ఏర్పాటు చేసే అవకాశాలనూ పరిశీలించాయి. భారత విదేశాంగ మంత్రి జైశంకర్, ఫ్రెంచ్ విదేశాంగ మంత్రి జీన్ డ్రియన్​ మధ్య జరిగిన చర్చల్లో ఇండో పసిఫిక్​ ఓసియన్ ఇనిషియేటివ్​లో​ భాగమవ్వాలని ఫ్రాన్స్​ నిర్ణయించింది.

భారత్-ఐరోపా మధ్య వాణిజ్య, పెట్టుబడుల ఒప్పందంపై చర్చలను వేగవంతం చేయాల్సిన ప్రాముఖ్యతను ఇరు దేశాలూ గుర్తించినట్లు విదేశాంగ శాఖ వెల్లడించింది. ద్వైపాక్షిక సంబంధాలు, ప్రాంతీయ, ప్రపంచ సవాళ్లపై ఇరుపక్షాలు చర్చించాయని తెలిపింది.

ఇదీ చూడండి:'కరోనా కథ ముగియలేదు.. టీకా ఒక్కటే మార్గం కాదు'