ఆరు దేశాలకు భారత్​ టీకాలు..మోదీ హర్షం

భారత్​కు పొరుగున ఉన్న మిత్ర దేశాలకు బుధవారం నుంచి కరోనా టీకాలు సరఫరా చేయనున్నట్లు కేంద్రం తెలిపింది. ఆరు దేశాలకు వ్యాక్సిన్లు అందించనున్నట్లు వెల్లడించింది. వీటిని ఉచితంగానే ఇస్తున్నట్లు స్పష్టం చేసింది. మరో మూడు దేశాలకు ఇచ్చేందుకు సిద్ధంగా ఉన్నట్లు తెలిపింది.

కరోనా టీకాలను పొరుగుదేశాలు, భాగస్వామ్య దేశాలకు సరఫరా చేసేందుకు భారత్ సిద్ధమైంది. భూటాన్, మాల్దీవులు, బంగ్లాదేశ్, నేపాల్, మయన్మార్, సీషెల్స్​ దేశాలకు వ్యాక్సిన్ డోసులను ఉచితంగా అందిస్తామని కేంద్ర విదేశాంగ శాఖ తెలిపింది. జనవరి 20 నుంచి వీటి సరఫరా ప్రారంభించనున్నట్లు స్పష్టం చేసింది. దేశీయ అవసరాలను దృష్టిలో ఉంచుకొని దశలవారిగా టీకాలను పంపిస్తామని వెల్లడించింది.

శ్రీలంక, అఫ్గానిస్థాన్, మారిషస్ దేశాలకు సరఫరా చేసేందుకు ఆ దేశాల నుంచి అవసరమైన అనుమతుల కోసం ఎదురుచూస్తున్నట్లు విదేశాంగ శాఖ తెలిపింది. మిగిలిన దేశాలు ఇదివరకే భారత్​ను అభ్యర్థించాయని పేర్కొంది.

మోదీ హర్షం..

ఇతర దేశాలకు టీకా అందించడంపై ప్రధాని మోదీ హర్షం వ్యక్తం చేశారు. ప్రపంచవ్యాప్తంగా వైద్య సంరక్షణ అవసరాలు తీర్చడానికి భారత్ విశ్వసనీయమైన భాగస్వామి పాత్ర పోషించడం గర్వకారణమని అన్నారు.

ఇదీ చదవండి:'యాక్టివ్ కేసులకన్నా టీకా తీసుకున్నవారే అధికం'