డిప్యూటీ సీఎంపై ఐటీ కొరడా- రూ.1400 కోట్ల ఆస్తులు జప్తు

మహారాష్ట్ర ఉప ముఖ్యమంత్రి అజిత్​ పవార్​కు చెందిన రూ. 1400 కోట్లు విలువ చేసే ఆస్తులను ఐటీ శాఖ సీజ్​ చేసింది. పన్ను ఎగవేత కేసు దర్యాప్తులో భాగంగా ఈ చర్యలు చేపట్టింది.

పన్ను ఎగవేత కేసుకు సంబంధించి మహారాష్ట్ర ఉప ముఖ్యమంత్రి అజిత్​ పవార్​ బంధువులకు చెందిన రూ.1400 కోట్ల విలువైన ఆస్తులను ఆదాయపన్ను శాఖ మంగళవారం జప్తు చేసింది. ముంబయిలోని నారిమణ్ ​పాయింట్​లో ఉన్న నిర్మల్​ టవర్​ భవనం సహా మరో నాలుగు స్థిరాస్తులను ఈ జాబితాలో చేర్చింది.

పన్ను ఎగవేత ఆరోపణలపై ఇటీవల అజిత్​ పవార్​ బంధువుల నివాసాలు, కార్యాలయాలపై ఆదాయ పన్ను శాఖ దాడులు జరిపింది. ముంబయి (IT Raid in Mumbai), పుణె, సతారా సహా మహారాష్ట్ర, గోవాలోని మరికొన్ని నగరాల్లో ఐటీ దాడులు జరిగాయి.

• డీబీ రియాల్టీ, శివాలిక్, జరండేశ్వర్ సాఖర్ షుగర్ కార్ఖానా (జరండేశ్వర్ ఎస్​ఎస్​కే), పవార్​ సోదరీమణుల (Ajit Pawar Family) వ్యాపార సముదాయాల్లో ఈ సోదాలు జరిగాయి. మొత్తం మీద రూ. 750కోట్ల రుణాలకు సంబంధించి స్కామ్​ జరిగినట్టు ఆరోపణలున్నాయి. అయితే ఆస్తుల తమకే చెందినవని, వాటిని అక్రమంగా కొనుగోలు చేయాలేదని పవార్​ బంధువులు నిరూపించుకోవాలని అధికారులు స్పష్టం చేశారు. ఇందుకోసం 90రోజుల గడువునిచ్చారు.
• సతారాలోని జనార్థన్​ షుగర్​ ఫ్యాక్టరీ(రూ. 600కోట్లు), గోవాలోని నిలయ రిసార్టు(రూ. 250కోట్లు), దక్షిణ ముంబయిలోని పార్థ్​ పవార్​కు చెందిన కార్యాలయం(రూ. 25కోట్లు), దక్షిణ దిల్లీలో ఓ అపార్ట్​మెంట్​(రూ. 20కోట్లు)తో పాటు మరికొన్ని ఆస్తులు జప్తు చేసిన జాబితాలో ఉన్నాయి.

'వాటితో సంబంధం లేదు..'

ఐటీశాఖ జప్తు చేసిన ఆస్తులతో డిప్యూటీ సీఎం అజిత్​ పవార్​కు ఎలాంటి సంబంధం లేదని ఎన్​సీపీ నేత నవాబ్​ మాలిక్​ తెలిపారు. ఆయన పరువుప్రతిష్టలను దెబ్బతీసేందుకే ఇలా చేస్తున్నారని మండిపడ్డారు. రాష్ట్రంలో ప్రభుత్వాన్ని కూల్చే విధంగా కేంద్ర సంస్థలపై కేంద్రం ఒత్తిడి తీసుకొస్తోందని ఆరోపించారు. ఐటీశాఖ చెప్పిన పేర్లలో ప్రతి ఒక్కరు నిర్దోషులుగా బయటకొస్తారని అభిప్రాయపడ్డారు.

ఇదీ చదవండి:ఉగ్ర కేసుల దర్యాప్తు కోసం ప్రత్యేక ఏజెన్సీ