'భాజపాతో అభివృద్ధి- కాంగ్రెస్​తో అంధకారం'

అసోంలో శాంతి, అభివృద్ధికి భాజపా ప్రభుత్వం భరోసా కల్పించిందని కేంద్ర హోంమంత్రి అమిత్​ షా అన్నారు. కాంగ్రెస్ హయాంలో ఇందుకు భిన్నంగా హింస, అస్థిరత ఉండేదని విమర్శించారు. అవకాశవాద రాజకీయాలే కాంగ్రెస్ విధి విధానాలని భాజపా జాతీయ అధ్యక్షుడు జేపీ నడ్డా ధ్వజమెత్తారు. ఈ ఇద్దరు నేతలు అసోం ఎన్నికల ప్రచారంలో పాల్గొన్నారు.

కాంగ్రెస్​ హయాంలో హింస, ఆందోళనలు, బాంబు పేలుళ్లతో కూడిన భయానక వాతావరణంలో ఉన్న అసోం.. ప్రస్తుతం భాజాపా పాలనలో శాంతి, అభివృద్ధి పథంలో నడుస్తోందని హోంమంత్రి అమిత్​ షా అన్నారు. జొనాయ్​లో ఎన్నికల ర్యాలీలో పాల్గొన్న ఆయన కాంగ్రెస్​పై ధ్వజమెత్తారు. విభజించు, పాలించు అనే విధానాన్ని ఆ పార్టీ పాటిస్తుందని ఆరోపించారు. 'సబ్​కా సాత్​, సబ్​కా వికాస్​, సబ్​కా విశ్వాస్'​ భాజపా విధానమని చెప్పారు.

"అసోం గౌరవాన్ని కాపాడతామని కాంగ్రెస్​ నేత రాహుల్ గాంధీ అంటున్నారు. బహిరంగంగా ఆయన్ను ఓ విషయం అడుగుతున్నా. ఏఐయూడీఎఫ్ అధినేత బద్రుద్దీన్​ అజ్మల్​తో జట్టుకట్టిన ఆ పార్టీకి అది సాధ్యమవుతుందా? అస్సామీలు, బంగాలీలు, మైదానాలు, పర్వత ప్రాంతాలు, వంటి విభేదాలను కాంగ్రెస్ సృష్టించింది. భాజపా చిన్న చిన్న వర్గాలను ఏకం చేస్తూ వారిని అభివృద్ధి దిశగా నడిపిస్తోంది. అభివృద్ధి కావాలో, అస్థిరత కావాలో తేల్చుకునే ఎన్నికలు ఇవి. ఎమ్మేల్యేలు, సీఎంలను ఎన్నికునే ఎన్నికలు కావు ఇవి. అసోం గౌరవాన్ని కాపాడుతూ అభివృద్ధి పథంలో మరింత ముందుకు నడిపించేందుకు జరిగే ఎన్నికలు ఇవి."

--అమిత్ షా, కేంద్ర హోంమంత్రి.

అభివృద్ధా? అంధకారమా?

అవకాశవాద రాజకీయాలే కాంగ్రెస్ ఏకైక లక్ష్యమని భాజపా జాతీయ అధ్యక్షుడు జేపీ నడ్డా ధ్వజమెత్తారు. దిబ్రుగఢ్​లోని టింగ్​ఖోంగ్​లో ఎన్నికల ప్రచారంలో పాల్గొన్న ఆయన.. కాంగ్రెస్ చెప్పే దానికి చేసే దానికి పొంతన ఉండదని, సమాజాన్ని విడదీయాలని చూస్తోందని ఆరోపించారు.

" కేరళలో సీపీఎంతో తలపడేందుకు ముస్లిం లీగ్​తో కాంగ్రెస్ జతకట్టింది. కానీ బంగాల్​లో మాత్రం సీపీఎంతోనే జట్టుగా బరిలోకి దిగుతోంది. ఏనుగు దంతాల్లా కాంగ్రెస్​కు రెండు దంతాలు ఉంటాయి. ఒకటి చూపించడానికి, మరొకటి నమలడానికి. కాంగ్రెస్​ అంటేనే అంధకారం. భాజపా అంటే అభివృద్ధి. అంధకారం కావాలంటే కాంగ్రెస్​ను ఎన్నుకోండి. అభివృద్ధి కావాలంటే ప్రధాని నరేంద్ర మోదీతో చేతులు కలపండి."

--జేపీ నడ్డా, భాజపా జాతీయ అధ్యక్షుడు.