'ఎలక్ట్రిక్ వాహనాలపై తిరగండి'.. పెట్రోల్​ ధరలపై ప్రశ్నిస్తే మంత్రి సలహా

Goa Minister on Fuel Price Hike: దేశంలో ఇంధన ధరల పెరుగుదల గురించి ప్రశ్నించిన ఓ వ్యక్తికి భాజపా మంత్రి విస్తుపోయే సలహా ఇచ్చారు. పెట్రోల్ రేట్లు భరించలేకపోతే.. విద్యుత్ వాహనాలు కొనుక్కోవాలని సూచించారు. పర్యావరణానికి జరిగే నష్టాన్ని నివారించడమే కాకుండా డబ్బులూ ఆదా చేసుకోవచ్చని చెప్పుకొచ్చారు.

Goa Minister on Fuel Price Hike: పెట్రోల్, డీజిల్ ధరలతో దేశంలోని సామాన్యులు అల్లాడుతుంటే భాజపా మంత్రి ఒకరు ప్రజలకు ఉచిత సలహాలు ఇచ్చారు. పెట్రోల్ ధరలను భరించలేని స్థితిలో ఉంటే విద్యుత్ వాహనాలు కొనుక్కోవాలని గోవా మంత్రి నీలేశ్ కాబ్రల్ సూచించారు. ఇటీవల పెట్రోల్ రేట్లు రోజూ పెరుగుతున్న నేపథ్యంలో ఓ వ్యక్తి మంత్రిని ప్రశ్నించగా.. ఇలా సమాధానం ఇచ్చారు. విద్యుత్ వాహనాలు వాడితే.. పర్యావరణానికీ మంచిదని, డబ్బులు ఆదా చేయొచ్చని చెప్పుకొచ్చారు. గోవాలో ఇటీవల కొలువుదీరిన మంత్రివర్గంలో ప్రజా సంబంధాలు, సంప్రదాయేతర ఇంధన వనరుల శాఖలకు నీలేశ్ ప్రాతినిధ్యం వహిస్తున్నారు.

"పెట్రోల్ ధరలు పెరిగితే మీకేం టెన్షన్? సోలార్ ఎనర్జీ రంగంలో ప్రభుత్వం చాలా పథకాలు తీసుకొచ్చింది. బైక్ కొనుక్కోవాలనుకుంటే ఎలక్ట్రిక్ బైక్ కొని ఉపయోగించండి. ప్రభుత్వం సబ్సిడీలు ఇస్తోంది. ఎలక్ట్రిక్ బైక్ కొంటే మీకు రెండు లాభాలు. పెట్రోల్ బైక్​ల వల్ల పర్యావరణానికి కలిగే నష్టం తగ్గుతుంది. మీ జేబుల్లో డబ్బులూ మిగులుతాయి. మన దగ్గర పెట్రోల్, డీజిల్ మాత్రమే పెరుగుతున్నాయి. శ్రీలంకలో అయితే పరిస్థితి ఇంకా తీవ్రంగా ఉంది."
-నీలేశ్ కాబ్రల్, గోవా మంత్రి

Petrol prices news:దేశంలో పెట్రోల్, డీజిల్ ధరలు ఆల్​టైమ్ గరిష్ఠానికి చేరుకున్నాయి. అనేక నగరాల్లో పెట్రోల్ ధర రూ.120 దాటింది. ఐదు రాష్ట్రాల ఎన్నికల సమయంలో యథాతథంగా ఉన్న పెట్రోల్, డీజిల్ ధరలు.. ఇటీవల 14 సార్లు పెరిగాయి. మొత్తంగా లీటర్ పెట్రోల్ ధర రూ.10 పెరిగింది. ప్రస్తుతం దిల్లీలో పెట్రోల్ ధర రూ.105.41కు చేరగా.. డీజిల్ ధర రూ.96.67కు పెరిగింది. హైదరాబాద్​లో లీటర్ ధర రూ.119.49గా ఉంది. డీజిల్ ధర రూ.105.49కు ఎగబాకింది.

భాజపా మంత్రి నీలేశ్ కాబ్రల్(పాత చిత్రం)

ఇదీ చదవండి:స్థిరంగా కరోనా కేసులు.. మరో 1,033‬ మందికి వైరస్