'సాగు చట్టాలను ఎందుకు రద్దు చేయలేరు?'

రైతుల బ్లాక్​ డే సందర్భంగా కేంద్రంపై విమర్శలు గుప్పించారు బీకేయూ నేత రాకేశ్​ టికాయిత్​. మహమ్మారి సమయంలో కూడా చట్టాలను ప్రవేశపెడుతున్నప్పుడు.. చట్టాలను ఎందుకు రద్దు చేయలేరని ప్రశ్నించారు. కొత్త సాగు చట్టాలు రద్దు అయ్యే వరకు ఉద్యమం ఆగదని స్పష్టం చేశారు.

మహమ్మారి సమయంలో చట్టాలను ప్రవేశపెడుతున్నప్పుడు.. సాగు చట్టాలను ఎందుకు రద్దు చేయలేరని కేంద్రాన్ని ప్రశ్నించారు రైతు సంఘం నేత రాకేశ్​ టికాయిత్​. ప్రభుత్వం తమ ఉద్యమాన్ని అడ్డుకునేందుకు ప్రయత్నిస్తోందని, భవిష్యత్తులో కూడా ప్రయత్నిస్తుందని ఆరోపించారు. అయితే వ్యవసాయ చట్టాలను రద్దు చేసే వరకు నిరసన విరమించమని ఉద్ఘాటించారు. ఈ ఉద్యమం విజయవంతం అయితే భవిష్యత్తు తరాల రైతులకు కూడా మేలు కలుగుతుందని ఆశాభావం వ్యక్తం చేశారు. సాగు చట్టాల నిరసనలు ఆరు నెలలు పూర్తి చేసుకున్న నేపథ్యంలో బుధవారం గాజియాబాద్​లో నల్ల జెండాలతో నిరసన తెలిపారు. ఈ సందర్భంగా టికాయిత్​ ఈ వ్యాఖ్యలు చేశారు.

'ప్రభుత్వ ప్రాధాన్యం రైతులకే'

మోదీ ప్రభుత్వం రైతులకే ప్రాధాన్యం ఇస్తుందని పేర్కొన్నారు భాజపా జాతీయ ప్రధాన కార్యదర్శి భూపేందర్ యాదవ్. కొన్ని రాజకీయ పార్టీలే రైతులను తప్పుదొవ పట్టిస్తున్నాయని ఆరోపించారు. కాంగ్రెస్​ హయాంలో సంస్కరణల పేరుతో ప్రతిపాదించిన చట్టాలనే ఇప్పుడు ఆ పార్టీ వ్యతిరేకిస్తోందని తెలిపారు. ఆ పార్టీ అవకాశవాద రాజకీయాలు చేస్తోందని వ్యాఖ్యానించారు.

ఇదీ చదవండి :బ్లాక్​ డే: '6 నెలలైనా కేంద్రం మమ్మల్ని పట్టించుకోవట్లేదు'