పెద్దల తీర్పు- 'ఏవండీ.. ఆవిడ వచ్చింది' రిపీట్​

ఉత్తర్​ప్రదేశ్ రామ్​పుర్​ జిల్లాలో ఇద్దరు భార్యలున్న ఓ వ్యక్తికి అదిరిపోయే తీర్పునిచ్చారు ఆ గ్రామ పంచాయతీ పెద్దలు. తెలుగు సూపర్​ హిట్​ సినిమా 'ఏవండీ.. ఆవిడ వచ్చింది'లో లాగా భర్త.. మూడు రోజులు మొదటి భార్య వద్ద.. మరో మూడు రోజులు రెండో భార్య వద్ద ఉండాలని, ఆదివారం తల్లిదండ్రుల వద్దకు వెళ్లాలని తీర్మానించారు.

ఆంధ్ర సోగ్గాడు శోభన్​బాబు నటించిన సూపర్​ హిట్​ మూవీ 'ఏవండీ.. ఆవిడ వచ్చింది'ని తలపించే ఘటన ఉత్తర్​ప్రదేశ్ రామ్​పుర్​ జిల్లా డోనక్​పురి తండాలో జరిగింది. డోనక్​పురి తండాలో చెందిన తక్మీల్ అహ్మద్​ రెండు పెళ్లిళ్ల వివాదంలో ఆ గ్రామ పెద్దలు ఆశ్చర్యపోయే తీర్పునిచ్చారు. ఆ భర్త.. వారంలో మొదటి మూడు రోజులు( సోమ, మంగళ, బుధ) మొదటి భార్య వద్ద చివరి మూడు రోజులు( గురు,శుక్ర,శని) రెండో భార్య వద్ద ఉండేలా తీర్మానించారు. ఇక ఆదివారం తల్లిదండ్రుల వద్దకు వెళ్లాలని తక్మీల్​కు సూచించారు. ఆ సినిమాలో కూడా శోభన్​బాబు.. వారంలో మూడు రోజులు శారద, మరో మూడు రోజులు వాణిశ్రీ వద్ద ఉంటారు. ఒక రోజు తల్లిదండ్రుల వద్ద ఉంటాడు.

ఫేస్​బుక్ పరిచయం..

అప్పటికే వివాహమైన తక్మీల్ అహ్మద్.. ఉపాధి నిమిత్తం ఛండీగఢ్​లో కొన్ని నెలలపాటు ఉన్నాడు. ఈ క్రమంలో ఫేస్​బుక్​లో అసోంకు చెందిన ఓ మహిళతో పరిచయం ఏర్పడింది. ఆ పరిచయం కాస్త పెళ్లికి దారితీసింది. ఇద్దరూ ఛండీగఢ్​లో 8నెలలపాటు గడిపారు. ఆమె గర్భవతి అని తేలిన వెంటనే ఆ మహిళను అసోం పంపించాడు తక్మీల్.

ఆ తర్వాత ఫోన్​ నంబర్​ మార్చాడు తక్మీల్. ఇటీవల తన ఆరు నెలల శిశువుతో ఆ యువతి ఛండీగఢ్​కు వచ్చింది. తక్మీల్ చిరునామా.. తెలుసుకుని ఇంటికి వచ్చింది. దీంతో ఈ విషయం మొదటి భార్యతో పాటు బంధువులు, గ్రామస్థులకు తెలిసింది. ఈ క్రమంలో గ్రామ పెద్దలు పంచాయితీ నిర్వహించి.. పై విధంగా తీర్మానించారు.

ఇదీ చదవండి :ప్రేమ రిజెక్ట్​ చేసిందని.. 22 సార్లు అతి దారుణంగా...