మీకు చదివింది గుర్తుండట్లేదా? - ఈ టిప్స్ పాటించారంటే మర్చిపోవడమన్నదే ఉండదు!

How To Read Books Without Forgetting : "మొత్తం చదువుతున్నా.. కానీ మర్చిపోతున్నా" విద్యార్థుల్లో చాలా మంది లేవనెత్తే సమస్య ఇది! మరి.. ఈ సమస్యకు ఎలా చెక్ పెట్టాలో మీకు తెలుసా?

How To Read Books Without Forgetting : పరీక్షల్లో ఎందుకు మార్కులు తక్కువగా వస్తున్నాయని తల్లిదండ్రులు, టీచర్లు అడిగితే.. "చదివింది గుర్తుండటం లేదు" అని చాలా మంది పిల్లలు సమాధానం చెబుతారు. వారు అబద్ధం చెబుతున్నారా అంటే.. కాదు వారు చెప్పేది నిజమే అంటున్నారు నిపుణులు! అయితే.. చదివే పద్ధతిని కొద్దిగా మార్చుకుంటే ఈజీగా గుర్తుంచుకోవచ్చని చెబుతున్నారు. మరి.. ఏ విధంగా చదవడం వల్ల గుర్తుంటుంది ? దీనికోసం ఎలాంటి పద్ధతులను ఫాలో అవ్వాలి ? అనే విషయాలను ఇప్పుడు తెలుసుకుందాం.

టేబుల్‌ ఫామ్‌ తయారు చేసుకోవాలి :
మీరు ఏదైనా ఒక అంశానికి సంబంధించిన విషయాలను చదువుతున్నప్పుడు.. అందులో మీకు మీరే కొన్ని ప్రత్యేకమైన విభాగాలను తయారు చేసుకోవాలని నిపుణులు సూచిస్తున్నారు. ఉదాహరణకు చరిత్రను చదువుతున్నప్పుడు నాయకులు, దేశాలు, ముఖ్యమైన తేదీలు మొదలైన విషయాలన్నింటికీ ప్రత్యేకంగా టేబుల్‌ ఫామ్‌ తయారు చేసి పెట్టుకోవాలి. అలాగే గణితం, భౌతిక శాస్త్రం లాంటి సబ్జెక్టులలో నిర్వచనాలు, ఫార్ములాలు, శాస్త్రవేత్తలకు సంబంధించిన వివరాలను విడిగా వేటికవే టేబుల్‌ ఫామ్‌ రాసుకోవాలి. ఇలా చేయడం వల్ల చదివే విషయాల మీద ఆసక్తితోపాటు అవగాహన కూడా పెరుగుతుందని అంటున్నారు.

మళ్లీ చదవాలి :
ఏదైనా కొత్త విషయాన్ని కేవలం ఒకసారి చదివి వదిలేస్తే ఏమీ గుర్తుండదు. అందుకే మీరు తయారు చేసుకున్న నోట్సులోని విషయాలను వీలు చిక్కినప్పుడల్లా చదువుకోవాలి. అభ్యాసం చేయనిదే ఏ పనీ సాధ్యం కాదన్న విషయాన్ని విద్యార్థులు గుర్తు పెట్టుకోవాలి.

విశ్లేషణ చేసుకోవాలి :
సైన్స్‌ వంటి సబ్జెక్టులలో టెక్ట్స్‌ బుక్స్‌ చదివితే ఉపయోగం ఉండదు. ఇందులో ప్రయోగాలు, కెమికల్స్‌ వంటివి ఉంటాయి. కాబట్టి వీటిపై మంచి పట్టు సాధించాలంటే ప్రయోగాలకు సంబంధించి లోతైన విశ్లేషణ చేసుకోవాలని నిపుణులు సూచిస్తున్నారు. ఇందుకోసం ఆన్‌లైన్‌లో క్లాసులు వినడం, యూట్యూబ్‌లో ప్రయోగానికి సంబంధించి వీడియోలను చూడాలని చెబుతున్నారు. ఇలా చదవడం వల్ల ఆ సబ్జెక్ట్‌ మర్చిపోకుండా ఉంటారు.

మైండ్ మ్యాపింగ్ చేసుకోవాలి :
చదివే పద్ధతుల్లో సృజనాత్మకతకు పెద్దపీట వేసే విధానాన్నే 'మైండ్ మ్యాపింగ్' అంటారు. ఇందులో మీరు నేర్చుకున్న అంశాలను చిత్రాలు, బొమ్మలు, గుర్తుల రూపంలో గీసుకోవాలి. కొత్తగా నేర్చుకున్న అంశాలన్నింటినీ అందులో జత చేయాలి. ఇలా చేయడం వల్ల సులభంగా గుర్తుంటుందని నిపుణులంటున్నారు.

అర్థం కాని వాక్యాల కింద పెన్సిల్‌తో :
అలాగే ఏదైనా కొత్త అంశాలను చదువుతున్నప్పుడు అర్థం కాకుంటే, మళ్లీ చదివి అర్థం చేసుకోవాలి. పదే పదే చదవడం వల్ల గుర్తుంచుకోగల సామర్థ్యం పెరుగుతుంది. ఈ అర్థం కాని పదాలు, వాక్యాల కింద పెన్సిల్‌తో గీతను గీసుకోవాలి. తరవాత దాని అర్థాన్ని తెలుసుకుంటే ఏ సమస్య ఉండదు.

ఫ్రెండ్స్‌తో చర్చించండి :
మీరు చదివిన కొత్త అంశాలు, సబ్జెక్టులను మీ స్నేహితులు, కుటుంబ సభ్యులతో చర్చించండి. ఇలా చేయడం వల్ల చదివింది ఇంకా ఎక్కువ కాలం గుర్తుండే అవకాశం ఉందని నిపుణులంటున్నారు.

తగినంత నిద్రపోవాలి :
మీరు ఎంత సేపు చదివిన సరే రాత్రి వేళల్లో తగినంత నిద్రపోకపోతేకూడా చదివినవి మర్చిపోయే అవకాశం ఉంటుంది. కాబట్టి, నిద్రకు తగిన ప్రాధాన్యం ఇవ్వాలి.