అసోం సీఎం ఎవరు? ఉత్కంఠకు తెరపడేనా?

అసోం సీఎం పదవిపై ఉత్కంఠ కొనసాగుతూనే ఉంది. సర్బానంద సోనోవాల్​, హిమంత బిశ్వశర్మల మధ్య గట్టి పోటీ నెలకొన్న వేళ.. రాష్ట్ర రాజకీయాలు దిల్లీ చేరాయి. పలు దఫాలుగా చర్చలు జరిగినా.. ఎలాంటి నిర్ణయం వెలువడలేదు. ఈ విషయంపై భాజపా శాసనసభాపక్ష భేటీ ఆదివారం నిర్వహించాలని నిర్ణయించారు. ఈ సమావేశంతో సీఎం ఎవరనే ఉత్కంఠకు తెర పడే అవకాశం ఉన్నట్లు భాజపా వర్గాలు భావిస్తున్నాయి.

అసోం సీఎం ఎవరు?.. ఇప్పుడు దేశవ్యాప్తంగా చర్చనీయాంశంగా మారిన అంశం. ముఖ్యమంత్రి పీఠం ఎవరిని వరిస్తుందనే విషయంపై సర్వత్రా ఉత్కంఠ నెలకొంది. ప్రమాణ స్వీకారం శుక్రవారం ఉంటుందని ఆ రాష్ట్ర ప్రభుత్వ కార్యదర్శి వెల్లడించినా.. సీఎం ఎవరనే విషయంలో స్పష్టత లేని కారణంగా వాయిదా పడింది.

126 స్థానాలు కలిగిన అసోం అసెంబ్లీకి ఇటీవల జరిగిన ఎన్నికల్లో ఎన్డీఏ కూటమిలోని భాజపా 60 స్థానాలు, ఏజీపీ 9, యూపీపీఎల్​ ఆరు సీట్లు గెలుపొందాయి. ఫలితాలు వెలువడి వారం రోజులకుపైగా గడుస్తున్నప్పటికీ సీఎం పీఠంపై ఉత్కంఠ కొనసాగుతూనే ఉంది.

కీలక నేతల మధ్య గట్టి పోటీ?

సోనోవాల్​, హిమంత బిశ్వ శర్మ

అసోం ఎన్నికల్లో భాజపా నేతృత్వంలోని మిత్రజోన్​ కూటమి ఘన విజయ సాధించింది. అయితే.. ముఖ్యమంత్రి పదవి ఆసక్తికరంగా మారింది. ప్రస్తుత సీఎం శర్బానంద సోనోవాల్​, పార్టీ కీలక నేత హిమంత బిశ్వశర్మ మధ్య గట్టి పోటీ నెలకొంది. ముఖ్యమంత్రిగా శర్బానంద పేరును అధిష్టానం ప్రకటించకపోయినప్పటికీ.. పార్టీ విజయం సాధించటంలో కీలకంగా వ్యవహరించినట్లు అధిష్ఠానం భావిస్తోంది. మరోవైపు.. ఈశాన్య రాష్ట్రాల ప్రజాస్వామ్య కూటమి కన్వీనర్​ హోదాలో ఈ ప్రాంతంలో సంక్షోభ పరిష్కర్తగా హిమంత బిశ్వశర్మకు మంచి పేరు ఉంది. ప్రధాని మోదీ, అమిత్​ షాలకు ఆయనపై మంచి అభిప్రాయం ఉంది. ఈ క్రమంలో ఇద్దరి నేతల్లో ఎవరి పేరును ఖరారు చేస్తారోనని పార్టీ వర్గాలు చర్చించుకుంటున్నాయి.

దిల్లీ చేరిన రాజకీయాలు..

నడ్డాను కలిసిన ఇరువురు నేతలు

సీఎం పదవిపై ఉత్కంఠ కొనసాగుతున్న వేళ.. ప్రస్తుత ముఖ్యమంత్రి సర్బానంద సోనోవాల్​, కీలక నేత హిమంత బిశ్వశ్వర్మలు దిల్లీకి రావాలని శనివారం ఆదేశించింది కేంద్ర నాయకత్వం. ఈ క్రమంలో దిల్లీలో.. భాజపా అధ్యక్షుడు జేపీ నడ్డాతో ఆయన నివాసంలో భేటీ అయ్యారు ఇరువురు నేతలు. ఈ సమావేశానికి కేంద్ర హోంమంత్రి అమిత్​ షా సహా పార్టీ సీనియర్​ నేతలు హాజరయ్యారు. ఇరువురు నేతలతో విడివిడిగా రెండు రౌడ్లు సమావేశమయ్యారు నేతలు. మూడో దఫాలో ఇరువురి నేతలతో కలిసి చర్చించారు. ఈ సమావేశంలోనే ముఖ్యమంత్రి ఎవరనేదానిపై ఓ నిర్ణయానికి వచ్చినట్లు సమాచారం.

ఆదివారం భాజపా శాసనసభాపక్ష భేటీ!

అసోం ముఖ్యమంత్రి పదవి ఎవరికి ఇవ్వాలనే అంశంపై తేల్చేందుకు ఆదివారం భాజపా శాసనసభాపక్ష సమావేశం ఏర్పాటు చేయాలని నిర్ణయించింది అధిష్టానం. ఈ మేరకు దిల్లీ నేతలతో భేటీ అనంతరం హిమంత శర్మ వెల్లడించారు. గువాహటిలో ఆదివారం ఈ సమావేశం జరుగుతుందని.. అన్ని ప్రశ్నలకు సమాధానాలు లభిస్తాయని ఆయన వివరించారు.

అయితే ఈసారైనా సీఎం ఎవరనేది తేలుతుందా? లేక మరోసారి ఈ అంశాన్ని సాగదీస్తారా? అనేది ఆదివారం తేలనుంది.

ఇదీ చూడండి:అసోంలో సీఎం పీఠం ఎవరికి.?