పర్వత ప్రాంతాలు ఎక్కువగా ఉండే హిమాచల్ ప్రదేశ్లో శాసనసభ ఎన్నికల నిర్వహణ.. పోలింగ్ సిబ్బంది పెను సవాల్గా మారింది. కొన్ని ఓటింగ్ కేంద్రాలు పర్వత ప్రాంతాల్లో ఉన్నందున అక్కడకు చేరుకోవడానికి.. రవాణా సౌకర్యం లేక సిబ్బందికి కాలినడకే ఆధారమవుతుంది. కులు జిల్లాలోని మూడు పోలింగ్ బూత్లలో ఎన్నికల నిర్వహించాలంటే.. సిబ్బంది దాదాపు 20 కిలోమీటర్లు నడవాల్సి వస్తుందని అధికారులు తెలిపారు.
కులు జిల్లా బంజర్ నియోజకవర్గంలోని గడపర్లీ పంచాయితీలోని శక్తి, టోర్షన్ పోలింగ్ బూత్లు, కులు ప్రాంతంలోని మణికర్ణా పంచాయితీలకు కాలినడకనే వెళ్లాలి. ఎందుకంటే ఆ ప్రాంతాలకు చేరుకోవడానికి వేరే మార్గం లేదు. దానికోసం ఎన్నికల సిబ్బంది దాదాపు 20 కిలోమీటర్లు మేర నడవాల్సి ఉంటుందని అధికారులు తెలిపారు. శక్తి, టోర్షన్ ప్రాంతల్లో మొత్తం 98 మంది తమ ఓటు హక్కును వినియోగించనున్నారు. అయితే ఈ ప్రాంతంలోని గ్రామస్థులంతా పూర్తిగా సౌరశక్తిపైనే ఆధారపడి ఉన్నందున అక్కడ సిబ్బందికి.. మొబైల్ నెట్వర్క్, విద్యుత్ సమస్యలు తలెత్తే అవకాశం ఉందని అధికారులు తెలిపారు.
ఈ మూడు పోలింగ్ బూత్లలో ఎన్నికలు నిర్వహించేందుకు రెండు రోజుల ముందుగానే పోలింగ్ సామగ్రితో సిబ్బంది బయలుదేరతారని.. బంజర్ సబ్ డివిజనల్ అధికారి ప్రకాశ్ చంద్ ఆజాద్ వెల్లడించారు. కులు జిల్లాలోని మొత్తం 35 పోలింగ్ కేంద్రాల్లో ఎన్నికలు జరగనున్నాయని తెలిపారు. అయితే.. సిబ్బంది మూడు స్టేషన్లకు చేరుకోవడానికి ఐదు కిలోమీటర్లు.. మరో తొమ్మిది పోలింగ్ కేంద్రాలకు దాదాపు ఏడు కిలోమీటర్ల వరకు కాలినడకన వెళ్లాల్సి ఉంటుందని సబ్ డివిజనల్ అధికారి తెలిపారు.
విధి నిర్వహణ కోసం పోలింగ్ సిబ్బంది ఇలా కిలోమీటర్ల కొద్దీ నడిచేందుకు సిద్ధమవుతుండగా.. దేశంలోనే తొలి ఓటరుగా పేరు గాంచిన వృద్ధుడు అసాధారణ నిర్ణయం తీసుకున్నారు. ఎన్ని కష్టాలు ఎదురైనా.. పోలింగ్ కేంద్రానికి వెళ్లి ఓటేసేందుకు సిద్ధమయ్యారు. హిమాచల్ప్రదేశ్కు చెందిన 106 ఏళ్ల శ్యాం సరన్ నేగి.. దేశంలోని అత్యంత వయస్కుడైన ఓటరుగా రికార్డు నమోదు చేశారు. అయితే.. వృద్ధాప్యం కారణంగా ప్రభుత్వం ఆయనకు పోస్టల్ బ్యాలెట్ సదుపాయం కల్పించినా.. నేగి నిరాకరించారు. తాను స్వయంగా పోలింగ్ బూత్కు వెళ్లే ఓటు హక్కు వినియోగించుకుంటానని స్పష్టం చేశారు. ఆయన కథ ఏంటో తెలుసుకోవాలంటే ఇక్కడ క్లిక్ చేయండి.
