సిద్ధూ హత్య కేసు నిందితుల ఎన్​కౌంటర్​.. ఇద్దరు మృతి

సిద్ధూ మూసేవాలా హత్య కేసు నిందితుల్లో ఇద్దరు.. పోలీసులతో ఎన్​కౌంటర్​లో మరణించారు. నిందితుల ఉన్న ప్రాంతానికి చేరుకోగా వారు కాల్పులకు తెగబడ్డారని, ఎదురుకాల్పుల్లో వారు హతమయ్యారని అధికారులు తెలిపారు.

పంజాబ్‌లోని అమృత్‌సర్‌ సమీపంలోని చిచాభక్నా గ్రామంలో పోలీసులకు, గ్యాంగ్‌స్టర్స్‌కు మధ్య భీకర ఎదురుకాల్పులు జరిగాయి. సిద్ధూ మూసేవాలా హత్య కేసు నిందితుల ఆ ప్రాంతంలో ఉన్నట్లు సమాచారం అందుకున్న అధికారులు అక్కడికి చేరుకోగా.. నిందితులు కాల్పులకు తెగబడ్డారు. ఈ క్రమంలో అధికారులు జరిపిన ఎదురుకాల్పులు ఇద్దరు గ్యాంగ్​స్టర్లు హతమయ్యారు. మృతులను జగ్​రూప్​ సింగ్​ రూపా, మన్​ప్రీత్​ సింగ్ అలియాస్​ మన్నుకుస్సాగా పోలీసులు గుర్తించారు. వారి నుంచి ఏకే 47, పిస్తోల్​ను స్వాధీనం చేసుకున్నట్లు తెలిపారు.

సుమారు ఐదు గంటల పాటు ఈ కాల్పులు జరిగాయి. జగ్‌రూప్‌ సింగ్‌ తొలుత మరణించగా నాలుగు గంటల తర్వాత మన్నుకుస్సా కూడా హతమయ్యాడు. ఈ ఎన్‌కౌంటర్‌లో ముగ్గురు పోలీసులు కూడా గాయపడ్డారు. ఈ వార్తను అందించేందుకు వెళ్లిన ఓ ఛానల్‌ కెమెరామెన్‌ కాలికి కూడా బుల్లెట్‌ గాయమైంది.

ఎన్‌కౌంటర్‌ ప్రారంభంకాగానే ముందు జాగ్రత్తగా మూడు అంబులెన్స్‌లను ఘటనా స్థలంలో సిద్ధంగా ఉంచారు. ఎన్‌కౌంటర్ ముగిసే సమయానికి ఘటనా స్థలానికి చేరుకున్న పంజాబ్‌ డీజీపీ గౌరవ్ యాదవ్ పరిస్థితిని పర్యవేక్షించారు. సిద్ధూ మూసేవాలా హత్య కేసులో పరారీలో ఉన్న ముగ్గురు నిందితుల్లో వీరిద్దరూ కూడా ఉన్నారని డీజీపీ తెలిపారు. సిద్ధూ మూసేవాలాపై తొలుత మన్నుకుస్సానే ఏకే-47 రైఫిల్‌తో కాల్పులు జరిపాడని పోలీసు వర్గాలు తెలిపాయి.

పాకిస్థాన్​ సరిహద్దుకు కేవలం 10 కిలోమీటర్ల దూరంలో ఉన్న ప్రాంతంలో ఈ ఎన్‌కౌంటర్‌ జరగడం తీవ్ర కలకలం రేపింది. తొలుత ఏం జరుగుతుందో తెలియక స్థానికులు భయాందోళనలకు గురయ్యారు. పోలీసులు వారికి పరిస్థితిని వివరించారు.

ఇదీ చూడండి :జుబైర్​కు సుప్రీంలో ఊరట.. అన్ని కేసుల్లో బెయిల్.. జైలు నుంచి విడుదల!