కేంద్రానికి రైతు సంఘాల తీవ్ర హెచ్చరిక

దిల్లీ పరిసరాల్లో జరుగుతున్న కర్షకుల నిరసన ఇప్పట్లో ముగిసేలా లేదు. తమ డిమాండ్లు నెరవేరే వరకు పోరాటం కొనసాగుతుందని రైతు సంఘాలు తేల్చిచెప్పాయి. సమస్య పరిష్కరించకపోతే తగిన గుణపాఠం తప్పదని హెచ్చరించాయి. అయితే, చట్టాలపై రైతులు అపోహ పడొద్దని భాజపా పేర్కొంది. కనీస మద్దతు ధరకు ఎలాంటి ఢోకా లేదని స్పష్టం చేసింది. బడా కంపెనీలు దోచుకోకుండా ఉండేందుకే చట్టాలు ఉపయోగపడతాయని స్పష్టం చేసింది.

వ్యవసాయ చట్టాలను ఉపసంహరించాలన్న తమ డిమాండ్‌ నెరవేరే వరకు ఆందోళన కొనసాగుతుందని రైతు సంఘాలు తేల్చిచెప్పాయి. అందుకోసం నిర్ణయాత్మక పోరాటం చేసేందుకే ఛలో దిల్లీకి పిలుపునిచ్చినట్లు పేర్కొన్నాయి. తమ డిమాండ్లకు ఒప్పుకోకపోతే కేంద్రం భారీ మూల్యం చెల్లించుకుంటుందని రైతు సంఘాల ప్రతినిధులు హెచ్చరించారు.

"బేషరతు చర్చలపై ప్రభుత్వం మాట్లాడటం లేదు. కొన్నేళ్ల నుంచి మోదీ మనసులోని మాట(మన్​కీ బాత్) వింటున్నాం. ఇవాళ దేశంలోని రైతులంతా తమ మనసులోని మాటను మోదీకి వినిపించేందుకు వచ్చారు. రైతుల మనసులోని మాట వినాలని మోదీని కోరాం. లేకుంటే పరిణామాలు తీవ్రంగా ఉంటాయి. తగిన గుణపాఠం తప్పదు. భాజపాకు, కేంద్ర ప్రభుత్వానికి ఎల్లప్పుడూ గుర్తుంటుంది. అందుకోసం ఎంతకైనా రైతులు పోరాటం చేసేందుకు సిద్ధంగా ఉన్నారు."

-రైతు సంఘాల ప్రతినిధి

ఐదు రోజులుగా దిల్లీ సరిహద్దుల్లో కొనసాగుతున్న ఆందోళనలు.. తీవ్రంగా మారుతున్నాయి. సింఘు, టిక్రీ, ఘాజిపుర్ సరిహద్దుల వద్ద పంజాబ్, హరియణా, ఉత్తరప్రదేశ్‌ సహా వివిధ రాష్ట్రాల రైతులు రోడ్లపై బైఠాయించారు. ఎముకలు కొరికే చలిలోనూ పోరాటం సాగిస్తున్నారు. వ్యవసాయ చట్టాలను ఉపసంహరించాలని డిమాండ్ చేశారు. కేంద్ర ప్రభుత్వం షరతులతో కూడిన చర్చలను వ్యతిరేకిస్తున్నట్లు తేల్చిచెప్పారు. నిరసనలను అణచివేసేందుకు రైతులపై ఇప్పటివరకు 31 కేసులు బనాయించారని రైతు నాయకుడు గుర్నామ్ సింగ్ చదునీ పేర్కొన్నారు.

గురునానక్ జయంతి సందర్భంగా సిక్కు రైతుల ప్రార్థనలు

బలగాలకు ప్రసాదం ఇస్తున్న రైతు

అపోహలు వద్దు: భాజపా

మరోవైపు, నూతన వ్యవసాయ చట్టాలపై అపోహలు పడొద్దని రైతులకు సూచించారు భాజపా నేత, కేంద్ర మంత్రి రవి శంకర్ ప్రసాద్. కనీస మద్దతు ధరతో వీటికి సంబంధం లేదని స్పష్టం చేశారు. ఆహార ఉత్పత్తులను ప్రభుత్వం కొనుగోలు చేసినంత కాలం మండీ వ్యవస్థ కొనసాగుతుందని చెప్పారు. నిరసనలకు దిల్లీ ప్రభుత్వం మద్దతు ప్రకటించడాన్ని తప్పుబట్టారు రవి శంకర్. రైతులను బడా కంపెనీలు దోచుకోకుండా ఉండేందుకు ఈ చట్టాలు ఉపయోగపడతాయని అన్నారు. ఎలాంటి పెనాల్టీ చెల్లించకుండానే ఒప్పందం నుంచి బయటకు వచ్చే రైతులకు ఉంటుందని చెప్పారు. పంటకు మద్దతు ధర వచ్చేందుకు ఈ చట్టాలు సహకరిస్తాయని ఉద్ఘాటించారు.

పంజాబ్ రైతులు గతేడాదితో పోలిస్తే ఇప్పుడే అధికంగా మండీలలో తమ పంటను విక్రయించారని మరో కేంద్ర మంత్రి ప్రకాశ్ జావడేకర్ తెలిపారు. ఎంఎస్​పీతో పోలిస్తే అధిక ధరకే పంటను అమ్ముకున్నారని చెప్పారు. ఎంఎస్​పీ, మండీలతో పాటు ప్రభుత్వ కొనుగోళ్లు సైతం యథావిధిగా కొనసాగుతున్నట్లు వివరించారు.

'సూపర్​స్ప్రెడర్'​ అవుతుందా?

కరోనా వేళ నిరసనలు జరుగుతుండటంపై నిపుణులు ఆందోళన వ్యక్తం చేస్తున్నారు. ఈ నిరసనలు కొవిడ్ వ్యాప్తికి కేంద్రంగా మారే అవకాశం ఉందని చెబుతున్నారు. చాలా మంది రైతులు మాస్కులు ధరించకుండానే నిరసనల్లో పాల్గొంటున్నారని.. దీని వల్ల కరోనా కేసులు పెరుగుతాయని స్పష్టం చేస్తున్నారు.

"నిరసన అంటే భారీగా ప్రజలు ఒక్కచోటుకు చేరుతారు. ప్రజారోగ్యాన్ని దృష్టిలో ఉంచుకొని కరోనా వ్యాప్తికి వ్యతిరేకంగా జాగ్రత్తలు తీసుకోవాలి. లేదంటే ఈ నిరసనలు సూపర్​ స్ప్రెడర్​లుగా మారతాయి."

-డా. సమీరాన్ పాండా, ఐసీఎంఆర్ అంటువ్యాధుల డివిజన్ హెడ్

అయితే రైతులు మాత్రం కరోనాతో పోలిస్తే కేంద్రం తీసుకొచ్చిన చట్టాలే ప్రమాదకరమని చెబుతున్నారు. వీటినే అతిపెద్ద వ్యాధులుగా అభివర్ణిస్తున్నారు.

పరీక్షలు-అవగాహన

మరోవైపు, ఆందోళన చేస్తున్న అన్నదాతలకు... దిల్లీ ప్రభుత్వం కరోనా పరీక్షలు నిర్వహిస్తోంది. నవంబర్ 28 నుంచి ఇప్పటివరకు 90 మందికి కరోనా పరీక్షలు చేసినట్లు అధికారులు తెలిపారు. ఎవరికీ పాజిటివ్ నిర్ధరణ కాలేదని చెప్పారు. అదే సమయంలో ఈ-రిక్షాల ద్వారా రైతులకు కరోనాపై అవగాహన కల్పిస్తున్నారు అధికారులు. కొందరు వలంటీర్లు మాస్కులు పంచిపెట్టారు.

రైతుల ఆందోళనల నేపథ్యంలో దిల్లీ సరిహద్దుల్లో వాహనాల రాకపోకలను నిలిపివేశారు. దిల్లీ-హరియణా ప్రధాన రహదారిని మూసేశారు. ఇతర ప్రాంతాల నుంచి వచ్చిన రైతులు దిల్లీలో అడుగుపెట్టకుండా గట్టి పోలీసు బందోబస్తు ఏర్పాటుచేశారు. 3-4 అంచెల్లో బారికేడ్లు పెట్టారు. జల ఫిరంగులు, బాష్పవాయు గోళాలను ప్రయోగించే వాహనాలను సిద్ధంగా ఉంచారు.

నిరసనల వల్ల దిల్లీ గురుగ్రామ్(హరియాణా) రహదారిపై ట్రాఫిక్​కు అంతరాయం

సరఫరాపై ప్రభావం

రైతుల నిరసనల వల్ల దిల్లీకి కూరగాయలు, పళ్ల సరఫరాపై ప్రభావం పడింది. దిల్లీలోని అతిపెద్ద హోల్​సేల్ మార్కెట్ అయిన ఆజాద్​పుర్ మండీలో వీటి సరఫరా సగానికి పడిపోయింది. ఫలితంగా సీజనల్ కూరగాయల హోల్​సేల్ ధరలు రూ.50 నుంచి రూ.100 వరకు పెరిగాయని విక్రేతలు తెలిపారు.